معذوره

رسمت بشفّي الزهري على خد الورق زهره
وهلّت من سما عيني دموعٍ أحيت الصوره

وشفت من العسل ثروه وجيشٍ يعلن الثوره
ويرفض فكرة إستعمار ينهب أجمل زهوره

وضاقت زهرة الشف بعسلها وإكتمت عبره
وعاشت في سجن صمت المشاعر شف مأسوره

توارت عن عيون الكون في ليلٍ نسى فجره
ظلامه يرفض غْيابه ويفرض سطوة حضوره

تجمّد سكّر الزهره ، تكسّر وإنقضى أمره
ورقها يرتعش يحمل بقايا روح مكسوره

وهبّت فكرة الحلم بحقيقه زادت الفكره
عذوبه تنثر إكسير الحياة بروح مقبوره

ألا ياقوة الله كيف تحيا الروح من نظره
رمتها عين صقرٍ في حضور الشوق محظوره

عيونه تنعش الميت .. وشفّه يودعه قبره
أنا أشهد وقفة (الأعراف) للعشاق مخطوره

تبسّم وإحتضر قلبي ، نظرني وإبتدا عمره
ويوم إنه ضحك شفت الخلود بضحكة غروره

نعم جايز غرور الزين لين إغتر بالفطره
على حلّه مدام إنه تسيّد سادة عصوره

سقاني من شراب الذوق تقديرٍ رفع قدره
بقلبي ، وإنحنى له يعتذر عن قمّة قْصوره

ملكني حاكم العفّه ونصّبني وسط قصره
أميره ودّها تصبح لأجل عينيه مأموره

أنا كلّي فدا روحه .. فدا صوته .. فدا طهره
فدا قلبه وتاريخه .. فدا حكمه ودستوره

كتبت إقرار نصّه ثروة إحساسي تحت أمره
أنا ملكه وزلّة سيّد العشاق مغفوره

غفرها قلبي إن صارت وإذا ماصارت /الفقره
تراها تقبل التجديد لو عمري طفى نوره

وهاذي بصمةٍٍٍٍ من روج شفّي والقلم حبره
كحل يسطر وثيقة حب بالأختام ممهوره

ختم حب وختم شوق وطهاره تكشف الشّفره
وتعلن للملا إنك حبيبي أجمل إسطوره

حبيبي حاصر الزهره وذاق من العسل قطره
وحارب لأجلها كل الجيوش وقال .. معذوره