صدفــــة

لا لا تعذر.. ترى ما للعذر داعي
السر ذاع .. وتسنى للبشر كشفه

كم من رخيص ٍ يكب الصدق بأسماعي
وآكذبه .. وأطرده .. وألعنه في وصفه !

وأقسم وآنا بالغبا .. (مفتون .. ملتاعي )
بإني أصون المودة وألغي الكلفه

والله لو أدري عن اللي بالخفى ذاعي !
ماكنت أوصل مواصيلي .. بلا وقفة

هذه حياتك .. وأنا ما أغير أطباعي
وهذه حياتي .. وخل القلب في نزفه

قدمت لك مايغيض البيض بذراعي !!
قلبي .. وأنا آشوف في كفة يدك رجفة

شكيت لكن نسيم العشق ذعذاعي
ولا هدني لين جتني ريحه الصلفة

ماكنت أظن بغدير الدمع مرباعي
وإن الغلى داخلي ينساق لي حتفه

قبل أمس واعي .. وأظنك بي بعد واعي ..!
والليل جالس وانا راسي على كتفه

وأبوحله عن رفيق ٍ للعمر باعي
ماقدر اللي شراه وسلمه عطفه

بانت عذاريب حبه وأعلن الساعي
بانه تسلم رسالة ( غدر ) من كفه

ياويل قلب ٍ غرق .. والسبة شراعي
يوم إيتمايل فرح .. والحزن بالدفة

ياسيد البيض .. لا تضغط على اوجاعي
وأنت إتظاهر .. ودمعات النساء حرفه !!

يكفي مدام الكنين اليوم ماطاعي
وقام ايتذكر صدى صدفات منكسفة

صدفة عشقتك .. وصدفة تطلب وداعي !!!
ياشين صدفة .. على ملعون ابو صدفه

أمسح دموعك ترى ماللبكى داعي
السر ذايع .. ودمعات النساء حرفه