سريت في فكري وجني مراويح
افكار ساهر والقصايد وساده
غرقن متن المشاعر سوابيح
حتى زهن صدر القصيدة قلاده
يوم ارقصن للشعر صارن مفاتيح
تفجر المهموم شعر وسعاده
كثر القصيد وزاد هم المجاريح
ومن عاند الأبيات زادت عناده
في معمعة هم وغرام وتباريح
والجرح ينزف والقصيده مداده
صارت مفاهيم اكثر الناس تلميح
وما كل من هام ابلغ العلم صاده
الشعر ظلما والمعاني مصابيح
والابيض ابيض والسواده سواده
في الشعر سادات ودخيل ومشافيح
والباقي اللي في بقاه استفاده
مرارة الحنظل شكت نفعة الشيح
الله لجل خلقه يحقق مراده
من يبني المبني على الرمل بيطيح
ومن يزرع الصبخا يضيع اجتهاده
ماينثني عزم الطيور الجواريح
فيها رغم قاسي الطبيعة جلاده
الحر صاد وغيره يحوم ويصيح
والبوم يمسي ما تعشى جراده
الشعر ما يغنيك عن هبة الريح
الشعر يفخر لا بقى الطيب عاده
ماهي صلاة الفرض مثل التراويح
الفرض فرض والزياده عباده
الطيب اساس وفايض الشعر تلميح
لاصار شعر وطيب يجنى حصاده
الشعر ضحى للوجيه المفاليح
خلد فعايلهم وصارت شهاده
ان ما ذكرت انك بعيد المشاويح
ما ينفعك شعرك وفعلك شحاده
جف المداد ومركبي عانق الريح
حتى لقا الساهر شرايد ارقاده
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.