انتصــار

وقّف طريق اللي جمع قلبه على قلب انتصار
وبشويش نزّل قلبه وسافر مثل حلم ٍ قديم

نفّذ على روحه من العالم عن الدنيا قرار
إنه بَلا دنيا بَلا عالم بَلا روحه مقيم

من عالي الذكرى رمى نفسه على وادي مرار
من كثر ما (كنت)رهنت عمره على باب الجحيم

وَحْده.. مسافر في عيون الليل واللحظه قِطار
راكب وحيد وحامل امتعْته على كتفه عتيم

الريح تلعب في فضا صدره ويهديها مسار
تْجادل الباقي من غصونه وتعلنها هشيم

مد النجوم السابحه صوره وخلّف له إطار
يشهد وراه انه فقد بايامه الوجه الحميم

فاقد تعال .. ووينك انتظرك.. وترنيمة أغار
صوت ٍ تعوّد يسمع الحانه وهجرانه عظيم

تشكّلت كل الجهات الأربعه حوله جِدار
اسمنته الوحشه واذا ناظر إلى العالي سديم

تساقطت كل الخيارات وبقى عنده خَيار
ليته سقط مثل الدموع اللي مسابقها أليم

يعيش مابينه وبين اوراقه وبينه حصار
ابعاده السرحه.. مابين العين والجمره ..نديم

سجّل بآخر حرف ..مايشبه على حد الديار
تنهيدة المخذول من ربْعه وهو رجل ٍ حشيم

ماصاح لكنه بكى ..ماصد ..لكنه أشار
خَلفه ..وقال : الله يسعدها ..وغيّبْه العتيم

تمت الإضافة بواسطة:عبدالله العجمي...