يا ربّة البيت الذي دوم لافيه
تلقى على بابه وفود المدينه
بيتٍ مساييره من البعد تلفيه
فيه البشاشه والوجوه الحسينه
حدٍ يودّع به وهذا يوافيه
وعساه يعتاد الفرح في سنينه
وفدٍ على بسط الكرامه تحيّيه
ووفدٍ يسير أو بالصّخا ملتقينه
هذه الحياه اللّي بها العزّ تبنيه
وتعيش به: هوب الحياه الغبينه
وش الذّي لي لج مع الناس بهديه
وانتي عطاياج الكبار الثمينه
تصخين بالطّيّب ولو حاجتج فيه
واتقدّمين امن المواهيب زينه
وايزين فيج الشعر عندي قوافيه
من حيث مالج في البرايا تنينه
يا الله عسى لج كل غالي ايخلّيه
ويطيب قلبج بالذّي ترتجينه
حمدان و مبارك من الشرّ يحميه
وطحنون لي نفسج بحبّه ضنينه
تبقين باخوانج ومن لج رجا فيه
في ظلّ عيشٍ وارفٍ تنعمينه
يا الله يللّي من دعا العبد يعطيه
أنك توفّقهم لحسن البطينه
كلٍّ على نورٍ من الرّشد يهديه
ويحيون فيها بالحياه الأمينه
وتحفظهم حفظ الذّي ما تخلّيه
وتضفي عليهم بالكنوف الحصينه
مابا على مدحي لكم شي يجزيه
وانتوا ليه في العمر راس الخزينه
يعل الحياب اللّي بروقه تزاغيه
أو رعدٍ يصوّت في قنوفه دنينه
ومخايلٍ يدفق بها السّيل واديه
على ترابٍ حيّهم نازلينه
على بطاح العين تصبح شواطيه
من العزر ترسي عليه السّفينه
يحيي الهشيم وممحل القاع يرويه
وتبني لها الهزلا ردوم السّمينه
وآختمها باعداد فرضٍ أصلّيه
على نبيّ جا بالاسلام دينه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.