يخايـل ناظـري

يخايل ناظري طيف الحلامي
اذا ما مرّ لي م اللّيل زامي

عطيب القلب مجروحٍ رماني
زماني بين واش وبين رامي

تحمّلت الوزا بالصّبر حتى
رثيت الحال من مثلي يلامي

وانا من هاجسي جنّي غريج
إبّحرٍ لجّ به محمل غرامي

صواب القلب ما ظنّي يهون
ولا يبرى وجرح القلب دامي

كرى عيني وشربي والمقات
ثلاثٍ يعلن عندي حرامي

وضوّا لي همومٍ لو تولّت
جبال الشام خلّتها عدامي

فهل كيف التّصبّر يا حبيبي
ولي ما بينكم عهد وذ مامي

ولي قلبٍ تملّكتوا هواه
شرى ما الخيل يملكها اللجّامي

وانا من عقبكم جنّي ربيط
بحبس القيد في برزخ مهامي

وحيدٍ لا لزيم ولا نديم
ولا خلّ يناشد وش علامي

ولا من معطيٍ عنّي جواب
ايلي من شاف حزني وانهضامي

لحا الله اللّيالي كم فيها
يشوف الحرّ نقصه والتّمامي

زمانٍ يوم انا جنّي غرير
بعزّي بين جاهي واحترامي

حبيبي فيك ذلّي وانكساري
وعزّى التّرفّع في مقامي

وراحاتي وروحي من هواك
وكيفاتي وجبري وانحطامي

وشفّي لك وشوفك لي نصيب
وموتي فيك تحيا به عظامي

اذا ما كنت لي خلّ حبيب
فمن يمشي على الدّنيا حطامي

انا برضيك بالعهد الوثيج
ولك بالله حبّي والتزامي

على انّي لك مطيع وفي هواك
شرى الملوك في حق العمامي

ايلي هبّت من القرب النسيم
بدهن العود تحمل لي سلامي

على من في حشايه موطنين
خيار الناس عالين المقامي

ولي فيهم محبّ ما يحول
وداده لو بعد تسعين عامي

حسين الدّل محمود السجايا
عزيز النّفس على طرق لوهامي

غناويّ أغرّ الوجنتين
هيوبٍ له على البيض احتشامي

تحلّيه السكينه والوقار
ايلي ما فضّ منطول الكلامي

يلاقي الزّين من طيبه ابزين
ومن شرواه يخلق في الأنامي

أيا يا يوسف الحسن البديع
أنا يعقوب هجرك في مظامي

وعن ذا النّون بلوايه تهون
ومثل ايّوب طال ابه السّقامي

ترى من ذاق ليعات لفراق
يعرف انّ الهوى صعب المرامي

فلابدّ المصايب ما تهون
ولو تصبح شرى مويٍ طوامي

ولي نفسٍ على البلوى صبور
عسى انّ الخير يجعل لي ختامي

وصلّى الله على خير البرايا
سراج الدين شفّاع الانامي

تعمّ الآل والصحب الكرام
عدد ما ناض برقٍ في غمامي