هات القلم ياللي تجيدالقرايه
واكتب على الصفحه بيانن بتفصيل
للي حذف له هرجتن في قفايه
والهرج له سامع وراوي وتسجيل
وللي يبارايي تبيع ٍ لرايه
يقول برنامجك يحتاج تعديل
قله ترى مانيب شاعر دعايه
ولاخذعلى نظم القوافي محاصيل
مالي بترويج القصايدهوايه
ولالي هدف في كثرة القول والقيل
الا ليازادت علوم خصمايه
وكثرت بصندوق البريد المراسيل
والحذف من دوني وشيٍ ورايه
وغنتبها فوق الجريد البلابيل
رفعت لي من بين الاعلام رايه
وللبيت عمدانه وللحرف تحليل
وضربت مابين العيون بعصايه
لابان غيض هل القلوب المغاليل
وليا ركب فوق المحاله رشايه
يبا يدلن الجمال الجواديل
والمجتمع يحكم على مستوايه
لا جاء المجال وميزوه الريجيل
وفالناس شاياتن وانا في شايه
مانيب عن واجب هل الواجب بخيل
اقوم بالواجب بمعنى العنايه
واعرف مقام البدر والجدي وسهيل
واعرض عن المعرض وراع الوشايه
ولانيب اصد عن الوجيه المقابيل
ولا يشتكي مني رفيقي خطايه
وصديقي اصدق معه لو طول الطيل
مدام واف ٍ لي يحصل وفايه
رفقة شرف ما يعتريها عراقيل
وقومي هل المعروف واهل الرعايه
للواجبات اللي عليهن دواليل
عتبان يزبنهم كبير الجنايه
لا مالقى عند القبايل مداخيل
يوم الحرايب يحكمون الرمايه
لا جاء المفاهم من خشوم المفاتيل
يوم القبايل عندهم نجد غايه
والا امتداده معتلج قرح الخيل
وسنا الاسنه مثل شمس المرايه
بهجنٍ مشاويحٍ وخيلٍ مشاويل
اخذوا على المثناه صك الولايه
من محكمة حدب السيوف المصاقيل
وصارو لها عن كل طامع حمايه
ومن دونها شربوا رهيب الفناجيل
شرقي منازلهم بلاد الفوايه
وغربي منازلهم بلد محبس الفيل
وفيهم الى شان الزمان ارتكاية
وقت القسا مثل الجمال المحاميل
اليا صار في بعض الرجال التوايه
تبينوا لمدور البن والهيل
وحيل ٍ عليهن الشحم تقل صاية
وكلامنا احلى من شراب الشهاليل
ويكفي عن الشرح الكثيرالرواية
مصادر التاريخ فيها التفاصيل
ومدام هم قومي وساس انتمايه
وعضدي الى صكت علي المحابيل
وشلون اجنّب عن طريق اعضداية
والدرب مرفوعه عليه القناديل
ومن لا اهتدى بآثار الأقلام تايه
اللي تقص اخبار جيل بعدجيل
للمهتدي يابين درب الهداية
والمنحرف لو كان يعطى درابيل
يمشي على عمياه حتى النهاية
والى انتهى دارت عليه المحاحيل
عميت ماخصيت راع الحكاية
وان عاد علمناه من ساري الليل
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.