أمس الضحى لمغني الورق لا حيت
هاضتني الورقاء بكثر الغناوي
ورق شكاويها تجي بعض توقيت
وأنا بكل الوقت وقتي شكاوي
مهو طرب في خاطري يوم غنيت
ولا نيب طربان ولاني بهاوي
والبارحة في تالي الليل ونيت
ونت مريض يوم شاف المكاوي
سهران طول الليل وأصبحت ممسيت
أعوي كما ذيب من الجوع عاوي
من حر ما أنس لاجيء بي وكنيت
وبكماه دام إني على الصبر قاوي
لو هو مرض منه بحثت وتداويت
لا شك ما بي ما يفيده مداوي
امن الرفيق اللي على طيبه ارهيت
وهقت نفسي بالرها والهقاوي
أبديت له ماني على غيره أخفيت
متوهق به أحسب إنه نداوي
لا والله إلا شتت الفكر تشتيت
أخذ مع الهاجوس ساعات داوي
وأنا لرفيقي دايم ما تقصويت
ماني على ما قيل معه بقصاوي
وأنا لرفيقي دايم ما ترديت
وردا رفيقك من كبار البلاوي
وإلى تعمد زله منه أغضيت
ولأني على ردا الرداله نحاوي
وأنا إلا شفت الردي عنه صديت
واشفق على اللي لآطيب الطيب حاوي
ظنيت به ظن وفي ظني أخطيت
وخطو الردى ما يصلك للحراوي
ويا حي لو صيحت ما يسمعك ميت
وأيضاً لو صيحت بأرض خلاوي
ولا فات فايت ما نفع قولة ليت
وقت الرخا ما عاد تفيد العزاوي
وأنا أتمنى انك تجي طيب الصيت
ومن المراجل ما يغويك غاوي
هذا منأي غير ذا ما تمنيت
وقد قيل قبلي ما تفيد المناوي
وحتى إليمن رحت ولا علي جيت
ماني على شوف الردي ابشفاوي
وإن كان لي ولا لغيري ترديت
فعندي لتيس أصمع ما تساوي
ولا تحسب إنك يوم عني تخليت
إني على ما قيل ما نيب قاوي
أنا لها أقوى من ألفين عفريت
وللحمل لا من كاد ما نيب ثاوي
وعلى النبي في تالي القيل صليت
اللي يعرف الظاهرة والخفاوي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.