وديبك

وديبك وابيك واباك وابغاك
جمّعتها لرضاك واختار فيها

شف ويش منها يتبع احكاك ورضاك
واللي لك اسقي مسمعك لا ضميها

غديت (افر)احكاي واساير احكاك
وانا تشّرف لكنتي واهتويها

مضمونها ودي بشوفتك واهواك
ياللي دروب اهل الردى ما تجيها

صانك ولي امرك وحبك وداراك
ولاقدر ردع الحظوظ ومجيها

نفسك مهذبها وعز الله ربّاك
مايدري ان جيش الهيام يغزيها

والله قسم يبلاك بي وانت يبلاك
باللي سواتي في العرب يرتجيها

محبة (ن ) ذربه من القلب تكساك
محبة (ن) صدق الهوى يكتسيها

يامرك قلبك بالوفا لي وتنهاك
ناس (ن) على لاماك تفرك يديها

رزين عقل ومن مزايا مزاياك
نفسك تحب وعفتك تمتطيها

وتطيع عقل (ن) ما بعد زل واغواك
مشاعرك تعصاه ..وانت تعصيها

ماشفت منك الا عيونك ويمناك
محبة (ن) راع الردى ما يبيها

يقبض فوادي لا تخيلت فرقاك
ياشف عين (ن) ما سواك يعنيها

وياعزوة اخوانك ومطلب هذولاك
ناس (ن) محبة والدك تدعيها

ناس (ن) تخدم ابيك كله لعيناك
وهو يحسب ان الله عليه يهديها

ياجعلها تفدى على الارض ماطاك
والله بمن هو مثلها يبتليها

لكن لعب في ياوليفي تغّلاك
ونفسي غلاك من الصدود يحديها

تبطي علي وانا هنا واتحراك
وكبدي لواهيب الصبر تشتويها

اجمّع علومك امن هناك وهناك
والله لو انها تنشرى لا اشتريها

وعذرك (انا لاهي) يا ويش اللي الهاك
لاهي ومر(ن)منت لاهي تليها

كانك مشكك في الوفا والغلا هااك
جوالي اقر القائمه كل ابيها

رقمك مع الصادر ولا وارد اسواك
والناس في اللي ( لم يرد عليها ).

واياك واياني...واياني اياك
من غيبة (ن) من دون عذر يحميها