شـآآآعرها

يطوّل سكوتك ولا يطوّل سكاتي
ترى الدعاوي بسيطه لا تكبّرها

خلك على خبري وظني وهقواتي
خابرني الضيق والضيقات خابرها

وسّع لي البال يا سيّد طموحاتي
ولا تغيّر النظره اللي كنت تنظرها

تقول : حب البشر طوّق مساراتي ؟
ابك انت حبك مساراتي يسيّرها !!

ان غبت عانت عيوني من معاناتي
وذكرك يصبّرني وطيفك يصبّرها

لا يا بعد شهرتي واعظم نجاحاتي
وكل القصايد من ابسطها ليا اشهرها

ولا يا بعد من يدوّر لانكساراتي
شعّار سبب وجودي ضيق خاطرها !!

انت اجمل اللي تسجل في سجلاتي
ان جيت : وين البشر ؟ وان رحت : مكثرها

يا اوّل وآخر قصيدي وآروّع ابياتي
محدٍ يحب القصايد كثر شاعرها !!

ما فاق حبي لك الا حبي لذاتي
يعني احبك محبّه ما اتصوّرها

يا اصدق من النشوه اللي في بداياتي
لا قلت لي كم بيت وقالوا انشرها

واغلى من الدمعه اللي كل صدماتي
تطلب يدييها !! واحجّرها ولا انثرها

وآحن مني عليّ ان شفت زلاّتي
القاك بررتها لو صعب ابررها

واطهر حكاية محبّه في حكاياتي
من قبل لا عيشها حسّيتك اطهرها

لا تلومني لا بديت آخاف وآحاتي
كل حاجةٍ غاليه ما ودّي اخسرها

ولا تضايق ليا كثّرت جيّاتي
ضيّعت فيك السنين وجيت ادوّرها

تعال رتبني ورتب حساباتي
او تدري شلون ؟! رتبني و بعثرها !!

مو مشكله لو تصير اطوّل مسافاتي
المشكله لابديت احسّك اقصرها

اكبر عيوبي : بديتك من نهاياتي
واكبر عيوبك : لقيت اوّلك بآخرها !!

يا مكتشف عالمي واقدم حضاراتي
حرام كسر الخواطر بيد جابرها ؟!

مدام تقدر على اللي فوق قدراتي
لا تذخر الفزعه اللي قلت ذاخرها

رجعني لوقتي او رجعلي اوقاتي
عامين تنطرني وعامين ناطرها

وتقبل الود والشكر وتحياتي
يا ساكن الروح والروح ومشاعرها

وروّق وركّز وحاول تفهم الآتي:
فكره تأكد قليل اللي يفكرها

لو ان غيري معاك يسوي سواتي
قلت : انت نعمه وهو عاجز يقدّرها !!