خذيت في الدنيا مشاوير ودروب
وذبيّت روس النايفات العسيره
مافاتني في الطيب معرض وماجوب
رجلي على درب المراجل مغيره
لكن تريّح ياصغيّر ياحبّوب
منت بحكم بين الوجيه السفيره
اسمي مع لستة هل الطيب مكتوب
وهذا يكفّيني ولا لي بغيره
ولاّ البن آدم فيه ميزات وعيوب
والرابح اللي له مع الطيب سيره
يامن لقلبٍ كل ماقلت له توب
من الهوى عيّا يعدّل مسيره
كنّه على درب الغنادير مغصوب
لا اخلف من الجازي ماضيّع منيره
يتوه في حب المزايين ويذوب
ولامن عذلته قال هذا مصيره
لاشاف له زولٍ مرتّب ورعبوب
وعليه وِسع عيون واشقر ظفيره
وخصره ليا شفته تقول انه محجوب
من الزّاد أو عنده مشاكل خطيره
أثره كذا خلقه معزّل وموهوب
وعنده تحكّم في النقاط الشهيره
والطول نايف والجسم كنه مصبوب
من شاف وضعه حاس ربي مريره
وهذا البلا ياناس والزين مرغوب
وش سوت بالشيبان غمزة سميره؟!
وقلبي انا ماهوب عكسي ومقلوب
يقدم على العسره وتصبح يسيره
أحيان يفوز وبعض الاحيان مغلوب
لكن حرام انه مايذخر ذخيره
يصبح بصوب وكل خلق الله بصوب
إلين يريّح في المحبه ضميره
حتى غدى ارهابي ومجرم ومطلوب
في كل قاع يطبّها وكل ديره
هذا عذيريبي ولاهو بعذروب
من قبلي كنسل في المحبه سفيره؟!!
الحب من عهد النبي نوح وايوب
يشب في وسط القلوب السعيره
ومن يكره يجيله مع الناس محبوب؟!
إلا اللي سيفه ناشبن في جفيره
رجل ٍ يشوف الزين ولاهزّه بنووب!!
في حد علمي اعتبرها كبيره!
ولو يفحصوا قلبه على الميكروسكوب
لقوه ميّت جعل في الامر خيره
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.