الا يا الله يا مالك مفاتيح الفرج يا الله

الا يا الله يا مالك مفاتيح الفرج يا الله
لك التسبيح والتحميد كله والثناء كله

نلوذ ونلتزم بحبال وصلك يا عظيم الجاه
وركنك لا دهانا الخطب نأوي له ونركن له

الهي خالقي مولاي سامع دعوتي رباه
تحل عقود حبل حارت الافكار في حله

تخوض بنا السفينة في محيط ما نشوف اقصاه
شراع قام الامواج تصفق فيه وتتله

وشفنا تالي الأيام شي ما بعد شفناه
مناهج عن طريق الحق منحرفه ومنحله

كشفنا منهج التكفير والهجرة حسب دعواه
يضيع دم معصوم عصمه الله ويحله

يفجر في بلد الاسلام ويروع هله وابناه
ويدعي الجهاد ويهدم البنيان ويهله

ويذبح مسلم غافل بدون اسباب ذبحة شاه
يقتل رضع اطفاله ويهدم فوقه الفله

هذا والله الفساد الله يكافي المجتمع بلواه
ويا بعد الجهاد من الجهاد اللي تخيل له

هذا نهج الخوارج نعرفه لو بدل مسماه
جميع الفكر فكره والهدف والنهج نهج له

يكفر بالذنوب الناس والوالي ومن والاه
ويوقد مشغل التخريب والارهاب ويشله

قتل عثمان بن عفان في بيته وفي مأواه
وقالوا قربة لله دم الشيخ واحسن له

ولوه وسيحوا دمه على المصحف وهو يقراه
غشاها الله وجيه من الغضب ومن السخط ظله

الا يا عظمها من كاثرة يا كبرها كبراه
سفك دم الخليفة شلة ما هيب كفو له

نصرك الله يا عثمان يا صاحب رسول الله
يا ذا النورين يا صاحب رسول الله وصهر له

ترى نهج الخوارج منهج التكفير كنه اياه
تطابق كامل في المعتقد والشله االشله

ولا يغتر فيه الا غشيم ما عرف مبداه
ومن يقرا عن التاريخ يدري به ويفطن له

ومن لا ينشد اهل المعرفه يبقى على عمياه
تروح ايام عمره في الجهل والعله العله

يقولون الرجال اهل المعرفة من نشد ما تاه
ومن ضيع طريقه ينشد العراف وتدله

ترى منهج سلفنا طاعة الوالي ولا نعصاه
نكمل له حقوقه طاعة لله ورضا له

وعلى ما بايع اصحاب النبي قمنا وبايعناه
ولا نرضى يجي في عهدنا غدر ولا خله

على الأثره في المنشط وفي المكره وما نرضاه
عقدنا بيعة الوالي وندعو له ونصبر له

نقدم له نصيحتنا على كف الولاء مهداه
بلا عنف وبلا تشهير باللين نتوسل له

ومن جانا يبي شقر العصا والراي ما طعناه
وبالبرهان والقران والحكمه نبين له

لعله يقتنع وان ما اقتنع دسنا على علباه
نحطه عبرة للي بعد نفسه تسول له

شباب المملكه دون العقيده والبلاد حماه
ولا وصلت حمى الاسلام لا والله لا والله

نسوق ارواحنا واموالنا فوق الاكف فداه
نموت ولا تدنس راية التوحيد والمله

هذا منهج سلفنا والخلف يمشي على ممشاه
نعز اللي يبي عز الوطن ونذل من ذله