ماعلى النور شرهة. لـ مسرى بدر

ماعلى النور شرهة - مسرى بدر

لو لمحت اشتياقك في عيون السحاب
يرتوي منك شوفي لو يغار الغدير

وان خذلت الاماني مايطولك عتاب
ماعلى النور شرهة لو يخون الضرير

الخطا في عيونك واشعر انك صواب
كن شوك التجاهل في يديني حرير

في ليالي وصالك قلب الاشواق ذاب
شوفتك روض ورد مات فيه العبير

في وجودي عذابك لو غيابي عذاب
كل درب بدا بي في حياتك قصير

التردد طريقك واللقا بك سراب
ينطفي نور عمري ماتقرر مصير

شابت ايام خلك والامل بك شباب
امشي دروب وصلك لو يكل المسير

ادري اني حبيبك لو يطول الغياب
كنت الاول وانا اللي في حياتك اسير

بالعطا شمس عمري ماتغيب وتهاب
تشرق انوار وصلي والعتب مايصير

ودام وصلك سراب في ليالي الذهاب
خل طرف الاماني ياحبيبي سهير

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.