أنزفي يالشريفه

أنزفي يالشريفه دام كلك طعون..
وبلي أرضك بدم الأبرياء يوم ساح..
دخني ياسماء غزه وشبي بهون..
ريح الأموات وجروح المصابين فاح..
اليتامى تشرد عنف.. مدري جنون..
والنساء شوف الأعين عرضها يستباح..
سال دمع الأرامل لين صك الجفون..
وصوت جرح الكرامه من فلسطين صاح..
وش يداوي جروحك لو تجف العيون..
دمعة العين تسهل عند دمع الجراح..
أدفني يالمقابر وأمتلي يالسجون..
والعرب عندها الدعوه مجرد مزاح..
أشربوا يازبانية الردى كل هون..
لا لشوف الطعون ولا لسمع الصياح..
تسمعون المنادي كن ماتسمعون..
يوم حتى حمام القدس بالحزن ناح..
وتنظرون بعيون مار تستبدلون..
عن بروق المدافع برقكم يوم لاح..
وش يفيد أجتماعن مايحرك سكون..
ماسمعنا سوى أنواع الشجب والنباح..
وقرع حلو الكؤوس ومد ملئ الصحون..
وتدعون العروبه والشرف والكفاح..؟
يلعن الله رجلن يهتني بالغبون..
كان ماثار دمه من غبونه وفاح..
يوم عصر الصحابه كلكم تعرفون..
حربهم بالسيوف المرهفه والرماح..
جل سبحانه الواحد لهم خير عون..
لاتحالف جيوش ولا ضخامة سلاح..
جاهدوا بالنفوس بكل شكلن ولون..
رحبوا بالممات وروحوا للفلاح..
وجهوا ألويتهم وين مايشتهون..
لين أقسى ملوك الأرض سلم وطاح..
كم أزالوا ممالك وأستباحوا حصون..
وزاحوا بفضل ربي صخرتن ماتزاح..
ومجدهم راح ياساده كما تعلمون..
ومايفيد التحسف دام هالمجد راح..
نطرد الال مانطرد همال المزون..
والمطايا تمد وتنتكس للمراح..
ياأهل الدين ماجتكم على ماتبون..
الجهاد بزمان اليوم ماهو مباح..
العرب ماخذوا غير الفشل والحزون..
واليهودي خذا في كل شي النجاح..
ليه يخطي ولاتخطي؟لأنه يمون..
دام رد الخطايا صار فيها جناح..
وليه تقتل ولا تقتل؟لأنك حنون..
وديتك ياعزيزي دون شك..السماح..
مغريات الحياة تنكس الرأس دون..
وديننا يستهان وأرضنا تستباح..
وأمة الضاد همه بس ملئ البطون..
من طعامن لذيذ ومن شرابن قراح..
للأسف ماجنينا غير كثر الطعون..
لين جرح الكرامه من فلسطين صاح..
(يلعن الله رجلن يهتني بالغبون..
كان ماثار دمه للعروبه وفاح..)