الشايب والكهف

من هجوس الشعر ياهوجاس فكري لاتدرى
سرها فوق النجوم اللي تلامع بالمجره

من سرج خيل المغازي مايضيع ولا يغرى
ثابت الخطوه ملك لو كان ضده مات حره

ياخفوقي اعرف ان الله هو اللي يسرى
لو سعو كل الخلايق لك ياقلبي بالمضره

عالمن غيب الليالي والصدور وماتسرى
كل امرن يرجع لعلمه مباديه ومقره

غير ياهجس القصيده بين كر وكر كرى
جر صوتك فوق رجم القاف ياهوجاس جره

المعاني من صخر والعزم قاسي ماتدرى
والبروق تلوح في عرض القنيف وفي مغره

والمحيطات اتلاطم بالهدير اللي يطرى
موج ماجه موج وامواج(ن)تموج اللي تمره

واحن في صدر السفينه بالحقايق وانتفرى
نسبح البحر العميق وننتقي من در دره

بالذكا والعلم والحكمه وعقل(ن) ماتزرى
وانتقاء الجمله اللي تطرب السمع وتسره

نسبك ابيات القصيده سبكة اللول المورى
وانتفنن في صياغتها بجوده مستمره

الفعل نربطه بالضمه وحرف الجر جرى
لين يمثل في صفوف البيت ويشكلل ممره

والشعر وهبه من الله يابخير ويابشرى
واللسان حصان وعنانه بعقل(ن)مايغره

والفطين اللي يثمن كلمته قبل ايتشرى
خوف من شرهة عزيز(ن)بالمشاريه يتشره

وامس في لذة منامي زارني طيف(ن)مورى
كني المبحر على سفح الخيال اللي يجره

الف فارس والف جندي والف عفريت(ن) مضرى
بالف سربه والف حربه بالبيارق مشمأمره

جيش كر يكر كر ان قيل ياهل الفعل كرى
وان غدى للموت كره كرر الكره بكره

مستبيح ارض الحما شره على الطاغي اشرى
مسقي العدوان من مر المراره مر مره

لين جينا عند كهف(ن)من زمانه قد تعرى
في متونه للرياح العاتيه مليون جره

شفتلي باب ونصيته قلت هذا به ممرى
ثم فتحته باسم رب(ن)يجري الكون ويفره

ولن ذا شايب جفونه صرها بالشاش صرى
شعره اشعث والهدوم اسمال كنه في مضره

قال عرفني بنفسك قلت زاير واتحرى
قال شسمك قلت اسمي مايفيدك لو بذره

قال لازم قلت انا ابن عرار واجرى يامجرى
غير قلي وش علومك ياعساها بالمسره

قال وعيونه تهامل ياشبيب الوقت مرى
والليالي ذوقتني عقب كاس العز مره

بار حضي واكثر العربان من حقي تبرى
مابقالي كون ثله تنعش القلب وتسره

قلت ابشر بالمعزه بحر والا كان برى
قال مشكلتي عويصه مابها للعين قره

قلت سندها علي والعلم بامر الله يفرى
مانخلي من زهمنا لو غدى للموت طره

انتصب واتك على متني بعزم(ن)مشمأرى
واطعن نحور المشاكل بالرهيف ولاتجره

قال حدق..في جدار الكهف واقرى لاتقرى
قلت اشوف النحت في خد الصفاة المصفهره

قال هذي نقشة الشعار يوم الشعر درى
ثابت بوجه الليالي والسنين اللي تمره

من قفى نبكي على ذكرى الحبيب بزود حرى
لين عصر الشعر الاجزل والجزل لله دره

غير بلغ ربعك الشعار علمي لاتورى
قل لقيت الشعر ينخى كل(شاعر)ويتشره