إبتسم

ياماخذ الدنيا وساعة صدر ومزاح وضحك
علّمني كيف اتخلّص من الضيق واضحك وابتسم

لاصرت ماتلقى صديقٍ .. يحتويك وينصحك
في وقت ماتاخذ به مْن الأصدقا .. غير الإسم

تخيّل انّك في مكاني وانت كل ٍ .. يجرحك
والهمّ كِسْرة خبز مابينك وبينك .. تنقسم

والناس حولك تذبحك من زود ماهي تذبحك
ماباقي الاّ يوسمون الطعْن في ظهرك .. وسم

وان جيت تشكي قالوا: اسكت بس والله يصلحك
الجرح جرحك .. والبلى بلواك .. والأمر انحسم

والصبر .. لو ماكل جنبٍ في منامك .. ريّحك
البال .. ماهيب راحته من راحة اعضاء الجسم

ولاّ انت يومك رحت تشكي وش معاك ومربحك؟
من صاحب ٍ بالعجز وانواع التخاذل يتّسم

يقسم لك .. انّه لو درى في ضيقتك مايفظحك
والمشكله .. يمشي ويفظح فيك .. ويضيع القسم

تفرض عليه المصلحه لو ما يذمّك .. يمدحك
يعني كأنّه لوحةٍ حسْب المصالح .. تنرسم

وتضيع ما تدري من اللي لانخيته .. يمنحك
الوقت صكّاته كثير .. وطعْم صكّاته دسم

والقهر .. لامن جيت تفرح ماتلاقي مطرحك
في عالم ٍ من ضيق صدر اهْله .. تدوّر للنسم

فانْ ضاق صدرك وسّعه ياشيخ .. واقلبها ضحك
معْك الحياه بتبتسم بس انْت الاوّل "إبتسم"