يقول ابن درباس

يقول ابن درباس في وسط ميدان
تسمعوا للهرج يا السامعيني

ذكرت ربي وانخزى كل شيطان
وابديت ذكر الله على الأجمعيني

الي رفع سمك السماء بغير عمدان
الواحد الي ما لملكه وزيني

وعلى النبي صليت للرب سبحان
سبحان عالم ما خفي و ما يبيني

و ركبت منجوبة على بنت شقران
بنت الشراري لاصلها حافظيني

غير الركايب بأصلها سبع قعدان
عسفت رباع وطبعها صار زيني

جمل عبكلي واللحاوي و هملان
ترضع رضيع حيران مع جولتيني

مرباعها بين الصداوي وفيحان
مع نشر بدو بالخطر مرتعيني

وركابها من عندنا مد عجلان
ممشى ثمان أيام له ليلتيني

وان روحت مع خايع عقب مرجان
هريف ذيب عن كلاب القطيني

هجيج ربدا يوم تلفح بجنحان
حط الطليحي والبعيثة يميني

تلفي على بيت السخاء فيه ديوان
تلقى اهل المعروف به جالسيني

الي مناختهم تقل حرث فدان
البن يحمس والمقهوي فطيني

يجذبك صقع نجورهم قبل الأذان
كل يقول لضيفكم عازميني

وصينية تلقى بها أذناب خرفان
من مير ابو جلال للغانميني

سلم على اللي للعدو سم ديبان
خص الأمير وربعنا الحاضريني

عقب الفروم الي على الخيل فرسان
شريدة الفرسان حبس الكنيني

خلو حوامي خيلهم لبو سلطان
طير الحبارى يعجب القانصيني

يلفح بجنحان السعد طير حوران
يقدى الجموع ويورد الهايبيني

عز أهل التوحيد لا خان بوقان
مضراب كفه في عدوه يبيني

على الأصايل طوعوا كل فسقان
فعل مضى وانتم لهم خابريني

ضف الدويش ولابته وابن عشوان
ودارت عليهم دايرات السنيني

مع طرش علوى ضف واصل و جبلان
كونه صباح والعرب منذريني

ولى محارمهم وزينات الألبان
أغنى الفقارى وأفقر المغتنيني

عبى لهم صم الحوافر بالأكوان
وعليهن الى يوتمون الجنيني

ردوا دبشهم بالشرى تقل حيطان
شبعوا به الأخوان والمشركيني

لو لا الامام الي هدم قصر برزان
الله يمتع به لهالمسلميني

تموت و غيظك فيك كان أنت زعلان
الصمت كنز للرجل يا لحزيني

حرب هل اللقوات كان أنت غلطان
خلوا ابوك يفارق اللذتيني

عاداتهم حرب المجوخ اليا بان
وسهومهم ترمي الشواة السميني

عينت أخو صلفة تعشاه سرحان
حسايف يا شوق موض الجبيني

ما ينصفط للموت قواد الأضعان
فهود الزراج وللنشاما خديني

ما حاضره عند الدبش كود رعيان
تنومسوا به والعرب غايبيني

فرخ القطامي ضفكم تقل سمقان
لو لا الحكم لك يالطوالة تبيني

قوم الزغيبي قطعوا بيت غضبان
وعقاب مكسور يجر الونيني

وهباس ابن هباس و خلف وقبلان
هجوا على مد النظر هاربيني

هجيجكم وصل الجزيرة وعمان
واللي سكنوا في نجد مستيسريني

يحكي بها جيل بالأصلاب ما كان
و تهجا ورا اسطنبول للدارسيني

جدودنا لجدودكم قبل عدوان
وحنا على الي مثلكم كايديني

الخيل لزوا والبواريد نيشان
و كان أنت جاهل انشد الفاهميني

الكذب خيبه ورد صدقي لمشعان
شهود الشريعة عندنا حاضريني

الادمي يخلق على قلب ولسان
الزول صورة والعمل بالثنيني

أقصر جوابك يا مضير خويران
تمخض مخيض مار ما صار شيني