أطرب وأصخّر كايفات الهناديب
وأغني المسحوب لازان وألعب
على طواريقٍٍ لحنها تعاجيب
يطرب لها راعي الجزيله ويعجب
ماقلتها في وصف زين الرعابيب
اللي تولع في هواهنّه الصب
ماشاقني غير النواميس والطيب
وأشوش لاذكروا هل الطيب وأطرب
وأنهل من الذكرى وعذب المشاريب
مناهل التاريخ ماهيب تنضب
وأذكر بني عمي حرار المراقيب
اللي تعلّوا كل عالي ومرقب
وإن قيل:من قلت:القروم المعاطيب
آلاد "بن دراج" فعلٍ ومنسب
كعام المعادي فزعةٍ للأصاحيب
جنٍ ليا ركبوا على الضمّر القب
وليا ذكرت مكمّلين المواجيب
يطري علي شالح وذكراه تاجب
ونجد العذيه مدهل الفطر الشيب
وأصايلٍ تهذب بالأبطال وتخب
وحس العزاوي عند حرش العراقيب
وعج الرمك والرمح والسيف الأحدب
ووضح البكار اللي عليها الكواليب
في ظل "ذيب الخيل" ترعى وتشرب
وبر الفديع بخوه ومن عقبهم ذيب
صارت مفاخر لآل هدلان تنسب
ووصيته للذيب لا يأكل الذيب
وجزل القصيد اللي يدوّن ويكتب
تاريخهم مافيه شكٍ ولاريب
صاروا مثل بين المخاليق يضرب
وافين مافيهم عيوب وعذاريب
ماقلت غير الحق ويشهد لي الرب
من بعدهم والخيل عرجٍ مهاليب
وشعاد لوتعسف .. وتسرج .. وتركب
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.