ذِكَرْت صبر ايوب والصبر مطلوب
هواجس الدنيا تثير العجايب
جرّيت من بحر الطواريق مسحوب
وتْحرك الأمواج صَفْق الهبايب
النّاس تسري ليل والليل مرغوب
الصبح يكشف كل مخطي وصايب
يَدْفعني الهاجوس للدرب مغصوب
ويردّني شيّن عن البعض غايب
المغريات ابصوب والعقل في صوب
والغيب نجهل فيه والقلب هايب
الوقت يخفي شي باللوح مكتوب
والحظ للانسان خايب وطايب
قلب الشقي من شدة الغيض مرعوب
شاف الغرايب من بعدها غرايب
لوّك تسد ادروب تطلع لك دروب
والرفض تسمع من وراه الطلايب
واصوات تصرخ سكرة الصمت عذروب
لا تبرْد اعظامك لفك النشايب
لو الزمن يبكي لك ابوجه مشحوب
تحيا شبابك باول العمر شايب
الحِسْد دَمّر ناس واختلفت اشعوب
طاحت حمولٍ من ظهور الركايب
يا الله دخيلك تسعف احوال منكوب
امسمى امصلي عن الذنب تايب
لا ضاق صدرك وسّع الصدر محبوب
المعطي الله والعطايا وهايب
الصاحب المُخْلِص على كل ما جوب
يمكن على رفعة مقامك سبايب
طيب الفعايل خير تمحي لك ذنوب
يزداد قدرك في قلوب الحبايب
لو تفقد احساس الامل وانت مسلوب
عذبت نفسك ما تهون المصايب
عشت الحياة اسلوب يقنع له اسلوب
والحق لا يمكن به الظن خايب
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.