الناس معادن. لـ محمد الدبيس

الناس معادن - محمد الدبيس

أنا أشهد صادق اللي قال ما ينفعك من هالناس
سوى لحمتك من هالناس اخوك وعمّك وخالك

وطارف هالعرب لو شفت فيه الطيب والنوماس
لزوم تشوف عقب الطيب مالا يخطر فبالك

معك يا طيب طيبه بالرخا وان طحت دار الراس
واذا اخطيت به مرّه نسى لك ماضي افعالك

وانا ما عمّ كل الناس فيهم نيكلٍ ونحاس
وأَصنّف بعضهم مثل الحديد البالي الحالك

واشوف البعض فضه لامعه والبعض مثل الماس
نصوحٍ فيه كل الخير.. وان زل القدم شالك

وابنصح من قرأَ شعري يرافق طيّبين الساس
نظيف الساس لامن صمّلت يفعل ويسعالك

ترى يا سامعي قال المثل عرق البشر دساس
نصيحة خلّها يا سامعي دايم على بالك

ردي الساس لو مهما تعلاّ للردى نكّاس
تصادق وافٍ وإلاّ بلا الصدقان أشوالك

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.