سيرتها من نجد يوم الفجر قاد
و يمتنها حد البحر من سهلها
الها و معها من هل السّيف ميعاد
يوم استجارة غيرهم ماكفلها
طير الثّلاث مجربٍ قبل الأعداد
ماجيت اجرب فزعته جيته الها
نايف ولد فيحان في وكر الأسياد
و فيحان زيزوم القبيلة جملها
من راس تركي وارثٍ مجد الأجداد
له سكةٍ ماقبله احدٍ دهلها
قبلي صدع فيها من النّاس قصاد
منظومةٍ بندر سرور ارتجلها
و انا على اثره جيت عانٍ للأحفاد
عزبتها نايف وهو معتقلها
مازرت بيت الجود بحثٍ عن الزّاد
لي حاجةً تصعب على غير اهلها
نفسي تتوق للفظها بس معتاد
اني ماطاوعها تعاند خجلها
مضمونها غامض و له سر و ابعاد
عليك حرز اطرافها ياجبلها
تكفى يابو فيحان ياخير مرتاد
شلها عن اللي باركٍ في وحلها
كم من عديمٍ تعتزي به ولا فاد
و كم واحدٍ يبرك لها ماحملها
نخوات في غيرك تُكبل بالاصفاد
و اليوم حطة في رحابك حللها
ان شلتها عاده لمعتاد الاسعاد
و ان عاندتك فحظ غيرك خذلها
ولا انت نايف نايفٍ فوق الاشهاد
تلوي خطام العاصيه و تعقله
جيتك وانا اطرد خامسة خمس شراد
ابا ارتحل وحده و الاخرى ارتحلها
و ثنتين احدهن جات بيدين الاوغاد
عليهم اهداها سروقٍ ختلها
حطوا عليها وسمهم جد و عناد
عندي دلايلها و عندك حولها
و الثّانيه رقم اربعه بين الاعداد
يمكن تقوم الخامسه في عملها
و يمكن يجي واحد عن الكل سداد
و كل الرّقوم التّاليه يختزلها
غلفتها عن فهم ناقل و نقاد
علي اقول رموزها و انت قلها
و ابلغ عباره فارقه بين الاضداد
حلحيلها هو من يواجه حيلها
و اصدق عباره قط فالأرض ماساد
الا بيوتٍ تنصر اللي دخلها
من بعد يوم اليوم ماهقوتي عاد
اقول: ليت الشّيخ نايف فعلها
عطرتها بالورد والمسك و الكاد
و اهديتها للشّيخ فابها حلالها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.