الـــــحــــكــــــمـــــــه

قالو نبي حكمه من الراس لراس
في مجتمع تغلب عليه السكينه

قلبت فكري والقلم فوق قرطاس
لين اقبلت جزل البيوت السمينه

عشت الخيال بواقع الفكر وحساس
وقلت اسمعو ياهل العقول الذهينه

بعض العرب من كلمة الغير حساس
مشاعره تبقى بصدره دفينه

في داخله كذب وتكبر على الناس
دايم يشيل أحقاد بغض وضغينه

يشعل شرار الحقد وللشر مقباس
وبليس ملعون الصلايب قرينه

مع زمرة الشيطان طرقي وعساس
يغتاب ولسان النميمه عوينه

وبعض العرب من سمعته ماله اقياس
كريم ويبذل ماجمع فى يمينه

في مجلس أهل الطيب والخير جلاس
واليا هرج من بينهم مهتوينه

خوته تشرى والردي صابه إفلاس
محزمك من جور الزمان وسنينه

هذا هو اللي خوته ترفع الراس
لن الكرم والجود متحاولينه

القرب منه عز ياطيب الساس
ويكفيك شيخان العرب مادحينه

وان جيت للحكمة تجي دون مقياس
تفطن لها بعض القلوب الفطينه

للصمت حكمه واحذر النفس تحتاس
وحاول تقود النفس مثل الرهينه

والكبر من بين الأوادم تغطراس
لوجاملو له كلهم كارهينه

والكذب مهما طال صاحبه ينداس
خصله قبيحة والبشر نابذينه

والحزن دمعه واضحه تجلب الياس
عقب الفرح تسقيك شربه حزينه

والحلم في بعض المواقيف نوماس
وصى عليه الشرع بكتاب دينه

والعلم بحر وصاحب العلم غطاس
يختار من در العلوم الثمينه

والوقت مثل السيف قطاع الأنفاس
إن ما قطعته صار وقتك سجينه

والصبر حمل ومن صبر فيه لا باس
يصبر على المكتوب ربي يعينه

يلي تقول الناس ما فيهم أجناس
الفرق واضح كانكم عارفينه

هذي هي الحكمة من الراس لراس
فصلتها لأهل العقول الذهينه