ويش جابك ؟ ؟ !!. لـ بادي بن جريعان

ويش جابك ؟ ؟ !! - بادي بن جريعان

ارجوك انا ماني بصاحبك هذاك
خل الكلام.. ولا تكثر عتابك

ما عاد لي قلبن لمن جيت حياك
اصلاً.. معاد يعرف كلمه ( هلابك)

وما عاد لي قلبن لمن رحت ناداك
مل.. وقسى.. ما عاد يعشق عذابك

قلبي تغير.. والسبب كثرت اخطاك
قلبي تغير.. يوم طوَل غيابك

كنت أرسمك.. واتخيلك.. واتمناك
واذكر طريقن ابتدأ وانتهى بك

وصرت أمسحك.. وأتجاهلك.. وأتحاشاك
وأقوم لحدن في مكاني حكابك

حتى الجروح اللي من أول تمناك
اليوم قدها تسألك.. ويش جابك؟؟

عذبت قلبن بدت الناس يهواك
وخيبت هقوة واحدن قد هقابك

أرجوووك سافر.. ابتعد وابعد خطاك
وقلبي لمنه اشتاق لك.. طق بابك

وأرجوووك تفهم.. ما تعمدت فرقاك
لكن وش أسوي لطول غيابك؟؟

مافيه حل ألا اني.. أصد وانساك
وأطيع ناسن قالوا..(أغنم شبابك)

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.