مرثية الوالد رحمة الله عليه

يالله يامنقذ عبيدك من النار
يامشفي الانسان من كل عله

ترحم عقيد القوم من نسل الاحرار
أبوي ياللي ليتني فدوة له

أبن الرجال اللي لهم في الوغى كار
صبيان يامٍ علمهم من يمله

يشهد لهم برٍ وبحرٍ وبحار
والترك من وقعاتهم مستجله

أهل البيارق لا غزى الحد جبار
مفرقين الخل من شوف خله

توشحت نجران وأخص أنا ثار
ليلٍ حزينٍ خاليٍ من الاهله

تسابقت للعلم شاشات وأخبار
حتى الجرايد دوّنت والمجله

قالوا ترى ملحان ودّع هل الدار
يوم الربوع اللي ذبحنا مطله

جيت التوي كني مسمّر بمسمار
وألا مثل مظلوم يبغى الادله

والدمع طوّح بي غدى كنه مدرار
والريق عجز الماء على أنّه يبله

وأصيح وأزهم قلت ودوني أثرار
اللي بها يسكن وأثرار من له

وأقبلت والانوار ماهي بالانوار
ولاشفت نور الحي جالس محله

أبكيك يايابه وأنا العقل محتار
وأقول في نفسي رحل قبل حله

ويبكيك قومٍ تنفض الجو بعبار
ربعٍ بعد مارحت صاروا أذله

ويبكيك فزّة صبح مع حزة سحار
ويبكيك معمالٍ ونجرٍ ودله

ويبكيك من يشكي من الضيم والعار
من ينصر المظلوم غير أنت لله

ويبكونك عيالك من صغار وكبار
وبلادك اللي بالرخاء مستهله

ويبكيك ذودٍ نتّج ويبكي بكار
ويبكيك من يشمّت ولو قلت قله

ماهو أعتراض ومؤمن بكل الاقدار
والموت حق وكل نفسٍ تعله

ياوجد حالي دمعتي هزّت أقطار
عليك ببكي مابقى الدهر كله

وياوجد حالي وجد من ذاق الامرار
تاهت به الاقدام ماأحدٍ يدله

وياوجد حالي وجد من للحرم زار
يبي يغسل الجسم من كل زله

وياوجد حالي وجد من خلفه صغار
روّح وخلاهم على غير مله

وياوجد حالي وجد مقطوع الاوتار
حمله ثقيل ولا لقى من يشله

وياوجد حالي وجد من شاف الاخطار
ومن الشقا دايم جروحه تتله

عليك ياللي مكرم الضيف والجار
ياتاج رأس الجود قله وجله

أفخر وأفاخر بك ولو صار ماصار
شيخٍ على الطولات سيفك تسله

يالله ياربٍ كريمٍ وغفار
تقبل دعاي وجنتك منزل له

بفردوسك الاعلى مع الناس الابرار
المؤمنين الصالحين الاجله

شيخٍ ومسلم مؤمن بك ولا بار
على نهج الاسلام خيط الاخله

لو قلت مهما قلت من نضم الاشعار
ماتوصفّه شخصيته مستقله

لابد ماترجع علي تحمل أسرار
مكسوفةٍ وأبيوتها مستمله

ماينفع المرضان تقديم الازهار
ولاعاد ينفعني السكن وسط فله

حملي ثقيل ولاتداويه الاسفار
أرجوك ياربي من الجوف شله

يابه علا قدرك على كل مقدار
ومن هو حكى بك جعل ربي يغله

لاهنت يارمز الرجوله والاصرار
من بعد ربي كلنا تحت ظله

وصلاة ربي عد همّال الامطار
على النبي الهاشمي قمت أهله