القلب يرقع بالضلوع المحناه
باقصى الضماير يجتلد باجتوالي
قلبي كما قدر ٍ على النار تصلاه
يصلاه من حامي اللواهيب صالي
إكتب لنا يالقرم قاف ٍ نضمناه
إكتب كلام ٍ وافين بالكمالي
عطه ابو فيصل يافتى الجود يقراه
يعطيك رده بالمعان الجزالي
نصيت شيخ ٍ تنثر السمن يمناه
شيخ ٍ كريم نال روس المعالي
ياشيخ ياللي كل الاوادم تنصاه
زرتك وانا ديرتي بالشمالي
يمناك على ذبح السمينه مضراه
ذباح حيل ً بالمضافه جلالي
مجلاس بيتك للمسايير ماحلاه
والبن الاخضر جاهز ٍ بالدلالي
ارجوك تنهي مطلبي وانت منهاه
ياشيخ والله عالم في حوالي
العرف عندك يافتى الجود نلقاه
وارجو السموحه وان تكرر سؤالي
الله يفكك من صواديف بلواه
وعسى الولي يجزاك حسن المعالي
انت اللذي بيتك على العز مبناه
وانت اللي صيتك شاهرا ً بالعوالي
ابوك قبلك بالمكارم عرفناه
مكرم فقير ضاهدته الليالي
سعود هو سعود ياسعد من جاه
هو الكبيروماضين له فعالي
متوارثين الطيب من ساس مبداه
وانتم هلا الطولات اول وتالي
لوجيت اعد فعولكم ماهي محصاه
اكثر من نبت الشجر والرمالي
عز الله انك عالي المجد ترقاه
والجود عندك ياعريب الخوالي
حان السفر ياشيخ مابه مراواه
ونبي نترخص يوم جاله مجالي
جنابكم ياشيخ ماود فرقاه
لاكن ضروف العايله والاهالي
احلف لكم والله والله والله
قربك عليه يابن الاجواد غالي
وصلاة ربي عد ماهل منشاه
على النبي اعداد وبل الخيالي
__________
شعر : عشيان بن سليمان
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.