... إضحك ...

بالخير مسّيتك ... وبالخير أصبّحك
ضيق الصدور الناس تبغى بداله

اضحك مع العالم ترى جوّها ضحك
لا عد تبسّم للأوادم جماله

إمّا تجي بالطّيب .. والطّيب يسمحك
ولاّ توكل / روح .. دربك سهاله

قلبك يخبّي والسواليف تفضحك
والغيض ما هو من سلوم الرجاله

إكسر جفا خاطرْك يالمحترم وإحك
راع اليمين تموت مدّت شماله

لا تكتم الضّيقه ترى الضّيق يذبحك
سولف وخلّ ابليس ملعون جاله

صاحبْك لدّك بالنّظر ..كيف ينصحك؟
ودّه يناصح والمواري جهاله

الصاحب الوافي صدوقٍ ويفرحك
صاحب وفا تبهجك طيبة مقاله

والخوّه اللي عند ربعك ترجّحك
ما غلّها غلّ القلوب وضلاله

بالعين تلمحنا وبالعين نلمحك
ولمح العيون أحيان يخفي دلاله

إن جاك منّا زلةٍ ما نبيّحك
الحق واجب تاخذه بالشّكاله

اقلط .. تفضّل / وإرْم همٍ يجرّحك
الهمّ ظالم ظلم واجب قتاله

سلم الرّفاقه كلّ واضح يوضّحك
والبدر تكمل طلّته باكتماله

وان كانت الضّيقه سبايب تبجّحك
بعض الصدور تضيق لكن هباله

المشكله قلبك وأظنّه يسرّحك
مسراح من ضيّع غنَمه و جماله

عَوّد ولكن طاح دونك وطيّحك
طيّحك وأقفى يوم زهّب رحاله

يا خُوي روّح كان هذا يريّحك
غيرك ترى مرتاح قلبه وباله

إن كان ما تضحك .. هنا جوّنا ضحك
ضيق الصّدور النّاس تبغى بداله