عـــلم الحيــــــــاة

يا صاحبي مجبور اعاتبك لا باس
كله من اسباب الغلا يوم اعاتبك

لو للحكم في صحة الراي مقياس
كان اقتنعت برايك وراي صاحبك

اكبر عيوبك دايماً يابس الراس
ما تستريح الا على اللي يناسبك

ترا الحياة اكبر من مجرد احساس
تضيع في غبة بحرها مواهبك

ما فيه شك ادروس الايام نبراس
الشك في .... هل تحتويها تجاربك؟؟

تعيش في دوامة العمر عسّاس
تلميذ واحداث الليالي تدربك

ومن مبتدا عمرك الى نزع الانفاس
تلقى حصيلك ما يضاهي متاعبك

علم الحياة ادراكه اصعب من الياس
واوسع رحابه من وسايع مذاهبك

لو كان تقدر تحصره بين الأقواس
ما عكّرت سود الليالي مشاربك

والناس .. قالوا قبلي وقبلك .. أجناس
ولا احد(ن) على رايه من الناس غاصبك

لا تحسب اللي يعجبك يعجب الناس
ولا تحسب اللي يعجب الناس يعجبك

بعطيك لدروب الأمل .. درة ألماس
قبل الصبر ينفذ .. وتقرب حضايبك

اليا أعتنيت بحفظها فزت بالكاس
وابشر بعز(ن) ما يقصّر شواربك

معرفة(ن) في غير دين الله إفلاس
تلقى جزاها عند من لا يخيبك