انتي قضيتي صيفك فجو باريس
وانا على خط الرياض وعجاجه
كني علي من الليالي كوابيس
والقلب فيه من اصطفاقه لجاجه
متعني اوجب من القوم فريس
رجلٍ ليامن جيت طلقن حجاجه
مقدرن عند الرجال السناعيس
ومقدرن عند العرب فالمواجه
ابوي درسني على الطيب تدريس
اشرب قراح الطيب واترك هماجه
وانتي مع الايام رافقتي ابليس
ولبسك تاج الكذب وارضاك تاجه
ولوك ملكتي فالحسن عرش بلقيس
ماهوب يغفر من خطاياك حاجه
حسنك خرافي صح مافيه تلبيس
ولا فيك لامنك نطقتي سماجه
لكن مدري ويش خلف الكواليس
والفرق بين المنعدل والعواجه
انا سمحت من الشعر فالقراطيس
والشعر احسه صار عمسن مزاجه
مافيه شين يستحق الأحاسيس
هذي بقايا الحب وايضا نتاجه
كنت احسبك فرحه طلعتي هواجيس
وجرحٍ لقلبي وانا احسبك علاجه
الامال خابت في جميع المقاييس
والحب اشوفه صار طافي سراجه
مثل العطر ياصاحبي تقدر تقيس
ولا من خلص عطره رميت الزجاجه
ودي اجدد بك لقا فيس تو فيس
وفي وجهي تعرف العنا فالمواجه
بلاد راهب او مسيحي وقسيس
يرضنك بلاد العجم والخواجه
ويرضيني اوجب من القوم فريس
مقدرن عند العرب فالمواجه
وايطاليا وجنيف من عقب باريس
وانا على خط الرياض وعجاجه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.