فَذّة حساوي...!

يابو منور عَز حالي للهواوي.
لا رقص قلبه على بنت القياده.

بنت عز وجاه من كفه سخاوي.
عمرها ما ذاقت الفقر ونكاده.

ابلج ومتغنج الموتر سماوي.
لقبوه الحوت ما يبغى الشهاده.

وقّفت.! غنّت لها ليت المناوي.
بالحلال اللي شرع ربي لْعباده.

جابته صدفه على قلب ٍ حياوي.
بالظهر عِزِّه وبالبطن السياده.

الثقل طبعه.! وزينه بالتساوي.
الله اللي صوره واحسن عداده.

حظ قلبي يارفيقي طاح ثاوي.
والحضيض اللي ملك قلبه وداده.

عينها عين الذي للجو هاوي.
عين شيهان ٍ شبح باول هداده.

لمّت المشرق وليل الحب كاوي.
وثغر مغربها حَمَاره من براده.

شفتينه راويه....! فذة حساوي.
حجمها واللون خِلْقَه في مهاده.

تشتكي للنوم.! دوم الخد ضاوي.
وصف خده ماهو بْنوره وغاده.

في سباته في زفيره ريح جاوي.
وخوف قلبي تآكل الفذه وساده.

مشيته كنه على الموكيت ياوي.
ولحظة التصوير ما تقبل اعاده.

نظرته رمح ٍ يفج الصدر هاوي.
والعنا في داخلي ملحه و زاده.

يا نسل قرم ٍ تعديت الهقاوي.
لا احترق وردي وش ابغى في رماده.

الفكر يسرح وهم القلب ضاوي.
له ذرى العينين مركوز بْسهاده.

كم قلوب ٍ حبها حاله عماوي.
وكم دموع ٍ عِقبها حلّت سعاده.

الفرح مهجور في عيني مساوي.
والحزن وحش ٍ وقلبي له بلاده.