غاب اتصالك ياهوى البال وش جاك
قلي عسى ماشر وش اللي جرالك
جوالي يشكي من غيابك وجفواك
وأنا بعد مثله شكيت ارتحالك
تبي الحقيقة كلبونا فقدناك
الله وأكبر منك ياطول بالك
كاني عليك أخطيت أبشر وأنا فداك
بالحق ومايلحق وكلّي حلالك
وكانه دلال وغنج يازين يزهاك
نايف ماهبّل فيه إلاّ دلالك
أموت بك واتعب لجل خاطر رضاك
وانته بقلبي ياحبيبي لحالك
العيد قرّب والمحاديب تنخاك
ارجع ترى عيديّتي في وصالك
خايف يفوت العيد وآنا اتحراك
ودّي صباحي يبتدي باتصالك
قل لي : من العايدين قل لي : أنا أهواك
عايدني قبل أهلك وعمّك وخالك
بلبس جديدي وانثر الطيب وانصاك
واروي جريدي من سحايب زلالك
وآعايدك والعيد شوفة محيّاك
عيدك سعيد وجمّل الله حالك
ضامي عطش ملهوف وارد على ماك
فاقد وعي من صحوة الموت جالك
مجنون ليلى لجلها داس الأشواك
وانهى حياته لجل ليلاه هالك
وآنا اعتبرني يالغلا من فداياك
بمشي لك دروب الخطر والمهالك
خذني عن عيون العشاشيق لحماك
راقب حقوق اللي نصاك وعنالك
أبيك تاعدني وآنا اوعدك ما انساك
أصلاً أنا وش لون أدوّر بدالك
أبيك ياروحي من أقصاك لأدناك
أبيك كلّك وأنت سو مابدالك
شاعرك ميّت فيك ياشمس الأفلاك
مثل القمر يتبع خطاك ومجالك
خلاص عاد ارجع ترى الصد فتّاك
طالبك طلبة ترحم اللي وفالك
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.