ارتفاع الاسعار

يالله .. يالمعبود .. يالنافع .. الضار
ياللي على امرك تستخيل المخيله

بامرك تسوق الريح خيرات وامطار
تحيي هشيم القاع ويسيل سيله

يالله .. بوجهك عن صودايف الاقدار
يالواحد اللي كلنا نلتجي له

يالله .. تلطف ستر سترك يا ستار
ما عاد باقي في يديني وسيله

افكار .. تقبل بي وتقفي بي افكار
ولاهو بغادي فالطريق الدليله

صدري غدا به مثل نقطه ودوار
هموم تقفي عنه .. واخرى تجي له

كني على تفصيل الاخبار رادار
سمعت واللي شفت انا اشيا مهيله

كله سبب زود المعيشه يالاخيار
والزند يقدح فوق خشم الفتيله

لا والله الا ولعت نار في نار
عزي لكم ياهل الفلوس القليله

لعبه محاكه بالخفا بين تجّار
وعذر الموزّع .. ( زاد سعره وكيله )

من عقب الاسهم .. ضاع مشروع الاعمار
وقصرت يدين اهل اليدين الطويله

ضحايا الاسهم ..( نصهم ) راح للشهار
(والنص الاخر ) .. عاش عيشه ذليله

والشعب هلّ الدمع مدرار .. مدرار
كنّه على وهّاج حام المليله

ما عاد يقدر يدفع قسوط واجار
والهمّ .. ياكل ما بقى من حصيله

ماهيب ملّي صارت القصه امتار
وكبد المعنّى من غثاها عليله

حتى البهايم تشتكي رفع الاسعار
زاد ( الشعير ) وين تلقى مثيله

تكفى يا ابو متعب ترا شعبك انّهار
وضعه تردّا والغلا شد حيله

قايد مفدّى عند شعبك وبيطار
يالقايد اللي ما رضينا بديله

يا حر ياللي جاذبك ماكر احرار
مالك مكان إلا براس الطويله

لا جات عندك تنتهي كل الاشوار
يصنع لك الممكن من المستحيله

عاين بعين العطف وتشوف الاضرار
شوف الغلا اللي مبتلينا بميله

يا سيدي حنا لكم وقت الاخطار
عون ٍ على الشدّه .. سيوف ٍ صقيله

حنا قبايل .. بس لا ثوّر غبار
من دوم عرض الدار نصبح قبيله

من دونكم حنا متاريس وجدار
يوم العميل يخون رفقة عميله

والله يديم الامن وطوال الاعمار
والله يحفظ الدار واهل الفضيله