ثمـانـيـن دمـعــه

البارح الجمعه ثمانين دمعه
هليتها من موق عينن حزينه

عينن تهل دموع ما نوع من نوع
استمطرتها من مخايل رزينه

قامت تذكرني بخلن قهرني
خلن رمى رمحه وصوب طعينه

وخلن مصوبني وخلن سلبني
وخلن رزع حبه بسلطة يمينه

صدفه لها قصه ونصن تنصه
أعرض تفاصيله على سامعينه

العرض الأول شفت عودن محول
من موترن فيه الوجيه الحسينه

وأرخيت عيني وأثر حظي يبيني
وأوما على سحر العيون اللعينه

ويلن به ثنتين يزهن بالزين
إن قلت ذي زينه فهاذيك زينه

اللي يحد الباب فارس وحراب
واللي وراه الموت في حاجبينه

وقمت أتلفت والضلوع استخفت
مثل الذي خصامته مقتفينه

ويلن به غمزه وهمزه ولمزه
اللي سطي منهم غمز لي بعينه

غمزه من البرقع وغمزه ما الأصبع
اللي بسلك من الذهب شابكينه

ويلن مالي حلحل الهم حالي
وابا اتعرف منزلن ساكنينه

والعود أخذ ساعه يدور بضاعه
حسبي على اللي عني معطلينه

والغايه إن العود أخذ كل مقصود
وبضاعته جاني بها في يدينه

واستخرج المفتاح ريض ومرتاح
ولا درى إن حبيبي عن يمينه

قلت انكسر يا سلف لا تدرج البلف
وإلا تحطم ياعمود المكينه

وإلا انكسر ياقير واذكرك بالخير
وأرتد قلبن من هلك ناهبينه

والغايه إنه راح وعزاه ما طاح
وقلبي يحن ومتصل مع حنينه

قلت الحقه ياجيب لا أشقق الجيب
وأصيح وأجمع كل من في المدينه

وأقول بيته وين والدرب من فين
بالله دلونيه يا عارفينه

وقمت اترقب له وطوفت قبله
حتى تعرفنا حصاته وطينه

وأمسيت هاك الليل بالهم والويل
واصبحت عند الباب كني رهينه

ولا دريت إلا بنورن تجلى
يمشي ويتعسف بخطوه هوينه

وفكيت ما بيدي وعارفت سيدي
وقلت قلبي جاك لا تظلمينه

قالت تبي تظلم وتحرد وتعدم
وراك ما تمشي بسكه مبينه

أحفظ على راسك وقيس قياسك
ترى عواقب بعض الأعلام شينه

قلت المهم الهم والليل الأظلم
حسبي عليك إن كان ما تعرفينه

قالت تجي بكره ومن غير نكره
دق الجرس وأنشد وقل ذاك وينه

قلت العلامه بينه يا حمامه
با مر والشباك لا تقفلينه