بــــــــغــــــــــــداد

الكبت يوم تشوف شي ..وكن عينك ما تشوف!!
والكبت يوم تحس شي ..ولا انت قادرتنطقه!!

وتصير ميت حي ..واقف عالة ًبين الوقوف!!
كذبه صحيح .. ولو يقول الصدق..ماحد ٍصدّقه!!

ياصاحبي..مافالزمن طيّب..ولافيه امعروف!!
وقتٍ يسوق الموت الاحمر مع رصاصة بندقه!!

موتٍ يغولك..غول..لاطعنة رماح ولاسيوف
ويروح عمرك للأ لم مابين زفره وشهقه!!

كم لي..وانا اعانيك يالحرمان من حضن العطوف؟
كم لي..وانا والهم والغربال والحرب حلقه؟!!

أنا ادري انه مايعيش من الرجال إلا الضعوف!!
والموت من حظ الشجيع اللي يدينه مطلقه!!

الله!!يابغداد..كم للعلم طافك من يطوف!
والله!!يالبصره..ياكم تبصرك عين ٍ مغرقه!!

والله!!يالكوفه..على شانك ياماتصفق كفوف!!
اليا حلا النوم لعديم الراي..منزوع الثقه!!

تبدلت عين المها والجسر..بعيون الخروف!!
حتى الرصافه بالرصاصه .. واحمر الدمع ازرقه!!

يفداك يا أرض العراق الشامخ اميات وألوف
ياكم تأملت العراق يكون فعلاً محرقه!!

لابنا العلوج..ابنا الخنازير..وخفافيش الكهوف
الخايبين السايبن الطغمه المسترزقه

حنا عرب ..وقت الشدايد مايدق القلب خوف
وأعني ..عرب ذاك الزمان اللي لياله مشرقه!!

أيام .. ماكنا نعرف الجبن أنواع وصنوف
واليوم .. ناكل جبن أنواع .. وفطيره ومرقه!!

الله أكبر..يانداءالحق..ياجمع الصفوف
صفاً على التوحيد للعليا يرفرف بيرقه

يا حلم..ترجيه العيون..وحمل..تنفيه الكتوف
يالمسلم العاقل تأمّل ..خاف ربك واتقه

يا من كتب شعر الغزل ف عيون نوف وخد نوف
وين الغزل عني ..وانا والهم والحرب حلقه!!

لا واحسايف!..وش يفيد من التوجد والحسوف؟!!
في موقف ٍ يورث بقلب الحر نار ٍ تحرقه!!

اليا اصبحت حرية الإنسان تُحكم بالظروف
كنه بنى له عشره ادوار وسكن في صندقه!!!