يوم دلوا زراريعنا للحريث

يوم دلوا زراريعنا للحريث
روحت به سويره عن العيثري

العرب يظهرون النخل والعيال
وانت تشري لها المسك والعنبر

حاط مرتين جعل ماهوب زين
جعل عقب هذا يهبد الشري

يوم جا ما عطاني لبيبيده
اتدفا بها يوم جسمي عري

يوم جتنا سويره من العارض
كنها ضبغة حل فيها اسعر

ليت مانع الى قلت له طاعني
يوم توه بمطلوبه مشبهر

قبل تاخذ بقلبه زهرة الربيع
في ذري الغار غره بها المنظر

قبل يتشربك في حيل الشرك
ثم يصبح على راسه مكنعر

يوم قامت وشاف الذي تلها
من وراها نبا الردف ومزبر

ما درى ان النثيله وكثر التراب
من وسيع الدواخل وهو ما دري

يا صبي استمع من عويد قضا
الدهر مدبة لين ما قصر

ما بقى منه غير العصب والعظام
مثل عود على الدرب ومقشر

احترس من صهوم القدر بالحذر
وانت مالك عن اللي لك مقدر

كل من كان قبلك بيوم وليل
شاوره والعلم عنه لا تقصر

حط بالك لما كان اوصيك به
فان هذي وصاة على خاطري

لا تضم الذي ما تعرف السوا
تودع الزين شين ولا تستر

يذن العصر والعشا فوق الرحى
القدر موضخ واللبن مخور

لا تضم الذي تشتري اللغا
دايم هرجها بالكلام الزري

لا نشدها بعلها بهرج لطيف
طوحت صوتها ما ادري ما ادري

انذفها في ثلاث تبعها ثلاث
لأجل تاكل طعامك هني مري

لا تضم الذي يطوح طيها
الضحى وانت في المقبره تقبر

لا تضم الذي قد حكى بامها
تحسب العيب باري وهو ما بري

لا تضم الذي ما تخلي العباة
دايم كنها تلعب العيفري

من جهلها تخلي ولدها يصيح
ما تسنع لها مورد ومصدر

يوم تظهر من البيت وش هي تبي
تبي عند غيرك طعام طري

تركه يا الخبل يا نكيث الحبل
لا تجزع إلى قيل يا المثفر

طلق العاهر وخلها تنطلق
من حبالك عسى بطنها للفري

لا تضم الذي عينها وإذنها
بالزاغير والصاير المسفر

ودها كل من مر مع سوقها
من شريف وطريف يقول اظهري

لا تضم الذي ما تربي الحلال
اغبر طبعها والزمان اغبر

لا تضم الذي ما تمل الرديف
تسري الليل للي لها يحتري

لا تضم الذي ما تخلي الرفيق
غايب رجلها أو بعد حاضر

الوعد مثل ما قال كحي واكح
في قيام العشر وان ظهرت اظهري

واقعدي عندنا لين ما يظهرون
واظهري وامطوع بهم يوتر

يا عسى جنسها دايم ما يعيش
عند الاجواد وان عاش ما يكثر

لا تضم الذي ينخزن دونها
دوم نجارها بامرها ينجر

لو تقول ارفقي يا مره بالحلال
دبري مرزقك ذا السنة واصبري

بان منها من العيب ما تكرهه
وباشرت في حلالك له تبذر

لو يخطره شريف كان ما سرها
ودها انه يخطر ولا يخطر

وان دخل باشرته بخبيث الكلام
وان ظهر وندبت له قال ابشري

سلط الله عليها قبلها تزوم
والضعيف بمرضاتها مصخر

مصخر مار ما وفق ابن الحلال
غبشته في الصفر واللزا يخرخر

من جهلها وسو تدبيرها
ما عليها من اللبس ما يستر

لا تضم الذي ما يحجها حجاب
دونحجانها كنها تنظر

يا مطول حجيه عن اللي تويق
لو تحطه عن الخمس ما يستر

هي على طبعها عاسي عودها
ما يعدل سوى إنه يبي يكسر

لا تضم الذي طلقت مرتين
يوم تطري لها طاري تنكسر

كل يوم لها عند أهلها نسيب
واحد داخل واخر يظهر

شارب مخهم واكل تخهم
غادي عندهم كنه العسكري

لا تضم الذي مالها من تهاب
خبلة هبلة ما لها ماكر

يوم تصبح تدوج بوسط البلد
كل دار تبايع به وتشتري

كل من كان يرضى بدوج المره
ودك إنه بنعليه يصطر

المره كنها الشاة بين البيوت
يطمع الكلب فيها ولو هو جري

لا تضم الذي وضعت روحها
دايم خالي شقها الأيسر

لا تضم الذي عمرها منتهي
كان ترجي عيال بهم تذكر

هي سفينتك لكني غدا الله عليك
ما دريب إنها ذبت الأنجر

لا تضم الذي تلتفت في الطريق
حط بالك لها في قفا العاير

وقل لها وش مريبك على الالتفات
يا ضراب الخنا بالثلاث اظهري

يوم كل الحيا عندها واتسع
وجهها حل في عينها الانكر

ما درت بالتلفت سهوم تصيب
بالضماير بها الكسر ما يجبر

وش تدور وراها وذا طبعها
كن ما غيرها في البلد يذكر

لو أبوها يهد الجموع بعصاه
أو بشلفا على الكبد تفري فري

أو أخوها يخلي قرينه يخور
مثل ما خار عجل مع السامري

لا تضم الذي بارد جمها
كل ش يابس وسقفها يمطر

ما تذوق اللذاذة وعمرك يروح
في (قصا) لو حلالك من الأحمر

لا تضم الذي رنة في المكان
صخرة ما تقلل ب (هيب) ابشر

ما تكلم وعندها لك جواب
وبسكوتها يزيد المرض باكبر

حيث ما عنده ما تصغى له
............................

لا حديث يسلي ولا من فراق
قلب لا يحزن وعين لا تنظر

ذا هو اللي يسره إلى فارقت
لين تأخذ سواها ولا تخسر

لا تضم الذي قد قضب خلفها
ضنا من غيرك لثديها يمجر

ما درى انه عليها سواة الرديف
قاضب في يده تكة الميزر

ومحشوم على كل حال يصير
وخصب وقتك أو مقصف مدهر

فهذي أمور عساها تطيب
من ذنوب مضت عسى تغفر

ثم صلوا على المصطفى والسلام
ما أضاء بارق بالدجى مسفر

أو لعن الحناين بلدن الغصون
ساجعات على الورق المزهر