الـحـيـاة الـهـنـيـّة

تبغى الحياة الطيبة والهنيّة
اسمع كلامي واتبع الشور ياهيه

الاوله تطيع رب البريّة
تتبع اوامره و تجنّب نواهيه

والثانيه خذ معك سنة نبيّة
خطوة بخطوة لا تعدى خطاويه

والثالثة خاو الرجال النقيّة
اللي تحب الخير دايم تسويه

اهل القلوب الطاهرات التقيّة
نصحٍ مع ارشادٍ وعرفٍ و توجيه

واهل العزوم العالية و القويّة
الدين فيهم بيّناتٍ مواريه

الصحبة اللي فالقيامة رضيّة
من يرضي الخلّاق لازم يراضيه

واحذر تخاوي الاش راعي الدنيّة
الرجل يعرف من فعايل مخاويه

واحذر من النمام راعي الوشيّة
في كل مجلس شر دايم تلاقيه

ولا تجامل الصاحب اذا انته خويّة
واتحب له ماتحب لك وانت تغليه

ترى المجامل مالصفات الرديّة
توافقه بالفم وقلبك ينافيه

واهل الكبر والحسد والعنجهيّة
واهل البخل واهل الحقد والمسافيه

واللي تديره فاليالي مريّة
وتعلّمه بالدرب دايم تقديه

تحرم يدينه ما تصافح يديّة
حتى الشنب مظلوم والله يجازيه

واحرص على الاذكار صبح وعشيّة
وانصحك بالقران لا لا تخليه

خله معك في كل روحة وجيّة
تسمع لما يتلى و تعمل بما فيه

واعلم ترى الدنيا سوات البنيّة
قد قالها شاعر وانا معجبٍ فيه

(لاخانتك دنياك قل عادة البنت
دنيا وفيها مالعذارى طبايع)

(من كثر ما جرّبت امنت و ايقنت
الطيب بالدنيا وبالبنت ضايع)

وان قلت ياخي ذي صعيبه عليّة
خلّك مع الشيطان واتبع مساعيه