كلٍ على الجوال راسل حبيبه
إلاّ أنا محروم لا راسلك ليه
ليه الخفوق اللي يحبّك تذيبه
وإنت الوحيد اللي سكن في محانيه
رقمي ليا شفته أبد ماتجيبه
وغيري ليا شفت اتصاله تلبّيه
إنته كذا دايم طقوسك غريبه
دايم تحب اتكون ياسيّدي بيه
مغرور متقلّب ولافيك طيبه
وأكبر دليل اليوم قلبي معاديه
أوّل اعلومك باللوازم امنيبه
ياكم زهمت القلب قصدك تهنّيه
اتسابق العالم وناسٍ قريبه
واتكون الأول لجل قلبي تبدّيه
وترسل لي ابيوت ورسايل رهيبه
وإن لامك أهلك قلت فدوة مواطيه
والحين كل منّا يعاند صحيبه
بالصد والحرمان والهجر والتيه
أغراك من دس السنا بالرويبه
اللي دروب الغدر أسمى مباديه
باكر تدوّر قلبي اللي تعيبه
وتندم على مافات وتنعي لياليه
كم ليلةٍ نطّيت راس الشذيبه
أصيح بِسْمك والجلاميد توحيه
آشاكي القمراء وعاني مغيبه
واراقب الجوزاء من الشوق ياهيه
أصبحت مثل اللي جذب له جذيبه
التايه اللي شال حتفه بياديه
قد قالو اللعاب جنّب قليبه
واحذر معاويدك اتوارد سوانيه
أخلصت في حبّك وروحي صويبه
والحمد لله ماعليّه مشاريه
قلبك عسى رب الخلايق يثيبه
وقلبي عسى الله لايخيّب مساعيه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.