فنجال طيني

لـ خلف المشعان، 01/06/07 05:31:28 PM، في غير مُحدد

فنجال طيني - خلف المشعان

دايم .. أردد بين .. نفسي وبيني :
بيت ٍ لابن شعلان .. محكم .. وثاقه :

( الشين شين .. وماكر الشين شيني
عدو جد .. ولا بقلبك .. صداقه )

شيه / التفت لي / حط عينك بعيني
عمر المنافق ... مايخلي .. نفاقه

يومٍ .. تمدّحني .. ويوم .. تهجيني
وهرجك .. على الوجهين مابه لباقه

مبطي / وانا اسمع بالرفيق البطيني
الين شفتك .. ماتحشم .. الرفاقه

إيه ادري انك بالكلام ... تعنيني ...!!
لكني احمق ( لو ) بداوي الحماقه

سولف بكيفك .. للمخاليق فيني
للطيب باب .. وللرديين ....... طاقه

اللي يبيني / لا يخومر / يجيني
واللي يبي .. فرقا عيوني .. فراقه

باقي .. معايه بيت .. بينك وبيني
راكب عليك / وهاك .. فكك وثاقه :

( فنجال طيني / ماانت فنجال صيني
تبرك مباريك الجمل ... وانت ناقه )

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.