يسيل الدمع من عينٍ حزينه
ويضيق الصدر باللي فاقدينه
خذاه الموت فجأة دون موعد
تقفاه القدر واقفت سنينه
في يوم أثنين والتاريخ / تسعه
صُدمنا بالخبر من ناشرينه
يقول : مبارك الغالي توفى
وانا وغيري ماحنّا مصدقينه
نكذب بالخبر .. تاره وتاره
الين ان الخبر أصبح يقينه
صحيح الموت سنّة كل حيٍ
وحنّا ( مسلمين ) وعارفينه
ولولا الخوف من ربٍ خلقنا
لاقول ان موتت الغالي غبينه
سموح الوجه في قسوة زمانه
رحوم القلب وأنتم خابرينه
يزور اللي مريض وعنه ينشد
بعيدٍ كان والا من اقربينه
يواصل كل من يقدر يواصل
وجواله شهد ضغطة يمينه
يضايقه الزمن والناس لكن .!
بقلبه ماحمل ذرة ضغينه
يارب ارحمه واغفر له ذنوبه
يارب تبدل السيه حسينه
ويارب تصبر اللي فاقداته
بنات صغار مايعرفْن وينه
وتحفظهن بحفظك يا آلهي
من ظروف الزمان اللي دفينه
ويارب تصبر احبابه وأهله
وكل منهو حزن يالله تعينه
رحل من هالحياة بقلبٍ أبيض
كلام الحق ناسٍ قايلينه
ومادام انّا شهود الله بأرضه
اذاً هالقول مايحتاج بينه
سبقنا بالطريق وراح عنّا
وعلى هالدرب حنّا لاحقينه
ابطلب كل من يسمع ويقرأ
( يآمن ) بعد مايرفع يدينه
عساه بجنة الفردوس ينعم
ويجمعه الولي مع والدينه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.