سامحني
بقلم
آمال محمود كحيل
سامحني لأني حبِّيتك
ومن غير قصد ضرِّيتك
وكانت أَقصى آمالي
أحقِّق حلمك الغالي
واشوفك
نجمة في العالي
بيلمع نورها ، ويْلالي
في نصِّ الرحلة خلِّيتك
وِسِبْتك للعذاب تِنقاد
وكاتْ غايتي
أَوَفِّي الدِّين
ما كانشي تحدَّي ولَّا عناد
نسيت كونك بدون جِناحين
وإنّ إيديَّه في الأصفاد
وحسن النية ما بيغنيش
وحيد في الرحلة
من غير زاد
أنا اللي لبست توب من ريش
وجِيت وراهِنْت بيك في مزاد
سامحني لأني غَرَّرْتك
وزوَّقت الأمل في عينيك
ويوم ما آمنتلِي خنتك
وسُقتك للألم يضنِيك
ومش هانكر
سنين بِعْتَك
بحجِّةْ إنّ قَلْبي عليك
ولِانياب الزمن سبتك
بتنهش كل شريان فيك
بإيه ينفع
أسوق أعذار
لقسوة قلبي ، أو خِيبته
وإيه يمنع تاخد بالتار
قصاد ميت جرح سبِّبْتُه
يا قلب حزين
في ليل ونهار
بيسأل ليه ... أنا سِبْته
وللمجهول ، وللتيار
بدعوى الحب سلِّمته
تمللي اسهر
على دموعي
ونِفسي انسى لكِن بَنْسَاش
دي غصَّة ف قلبي
وضلوعِي
عليك على حِلم بِعْتُه بلاش
وريح الخوف
طَفَى شموعي
وصوت جوايا ما بْيِهداش
وإيه هايهَدِّي من رُوعي
وعين الظلم ما بتغفاش ؟!
حروف ندمي اللي ناقشاها
على صدري ، على جبيني
أكيد باتمنَّى
تقراها
وتقرا الحسرة في عيوني
دا لو موتي اللي هايكفَّر
ذنوب عمري
ما يِكْفيني
سوى إنك في يوم تغفر
جايز عفوك يعزِّيني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.