لو لاني أبدي نايفات المشاريف
وأعذل على عين ٍ سببها زعلها
لأصيح صيحة من وخذ له مشاعيف
سحج البكار اللي تلاحظ فحلها
قفوا عليها فوق قب ٍ مزاغيف
وأرقابها عوج ٍ تلافت لهلها
تنخى هل العادات وأهل المواقيف
في راي من بيض الدفوف يعزلها
وثور عجاج الخيل مثل العواصيف
وتقنعت صم الحوافر سبلها
ولحقوا وفكوها بحدب مراهيف
ترس العقول ليا غشاها جهلها
تعاقبوا بمزرج الهند والسيف
وتعاطفت وضحٍ تواما كثلها
وراحت بشايرها تجر الغطاريف
سولف مسولفها وغنى مثلها
قلته وانا حسات قلبي مراديف
ولا كل من شال الأسية حملها
عقل ٍ كبير وعقل يرثى له ضعيف
تثر عليه التافهه من زعلها
وقلبي على جمر تلوفه هفاهيف
والكبد معكوف المسنن نتلها
يا بوحسن ضاقت علينا المحاريف
في ديرة ٍ كن التهامي نحلها
والرأي رأيك ياحكيم العواريف
المعرفة بيديك وأنته جملها
السالفة راحت مثل مجلس جنيف
تشتت بين الشعوب وعملها
وأصبحت مثل مخالف خليف لخليف
كبد ٍ تعالج به وكبد ٍ دبلها
ورأس الجبل مزموم طيف ٍ ورى طيف
وفي غابته سبع السباع يحبلها
ومعزب الضيفان لو يكرم الضيف
ليا لقى رأس الذبيحة نشلها
وليا نشدته قال مامن تخاليف
كرم سباله والشوارب قذلها
يابس بلايل مايعرف العجاريف
يا بوحسن قض الحبال وافتلها
والصبر طول والمنايا مخاطيف
وكثر التدري مايوقف عجلها
دنيا ً مغازيها مقاف ٍ مناكيف
نصابة تضحك على من جهلها
ياما نجت غرات ناس ٍ مواليف
وياما تردى سلمها في شللها
لويعلمون بغيبها والصواديف
حطوا رصيد كل ميلة عدلها
بنك ٍ على الدنيا يعد السواليف
والآخرة بنك ٍ ينزح مللها
يالله يامنش المزون المراديف
اِ غفر لنفس ٍ مقتفيها عملها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.