الموفق للجميله

الموفّق للجميله ماحسب هذي وذيك
‎‏‎‏‎سخّره ربي لمنهو ضاق صدره واعتما

كن ربي خالقه لا ضاقت الدنيا يجيك
‎يجبر الكسر المضاعف فيك دايم ويحما

لا نصيته في لزوم يقول أبشر ما عليك
‎يقضي لزومك قبل تطلع من حدود الحما

تنشر البيضا على مثله لوقفاته هذيك
‎صاحبٍ لامن نخيته فار دمه واحتما

جعل يفداه الغشيم اللي بعد يفزع يبيك
‎تمدحه وتقول "ما مثلك رفيق ومحزما

لا تجمّل فيك مره 'يحسب أنه مشتريك'
‎جعل عيني كان جيته بعد هذي بالعما

ودي أقول أنت يا الكذاب { كل مما يليك }
‎ولا تمد يديك في 'شق المديح' وتحلما

أنت مثل الملعقة .. لا قارنوها بالكريك 🥄
‎جعلني ما أنحد لك في يوم جوع ولا ظما

المواقف تفحص الاصحاب وتبين ذويك
‎‏‎‏‎وتفضح اللي فاللزوم السان لاصق في جما

طالبك يارب وأنته فالكرم مالك شريك‏
‎ما لعبدك غيرك أنته يا آلهي إنما

جيت لك مذنب وتايب والرجا منك ولديك
‎أغفر أذنوبي وطهرني وأمتني مسلما

‏الجمايل حمّلتني هم والمشكى إليك‎‏
‎والجميله تطرح المحتاج من سابع سما

‏جعلني ما أحتاج غيرك بعد حسن الظن فيك
‎ولا أنكسر قدام عين اللي طلبته واندما

#فهد_المنصوري