يا سيدة شعر الغزل | الطائف

يا ليل عطني من زهر غصنها فل🌷
‎‏مالي ( بعوشزها ) عطوه الطفارا

لي حزتن تغني وتطرب هل الحل
‎‏لا حان موعدها • تجيني تبارا

‏افرش لها صدري وقافي لها زل
‎‏في مشيها عدل ، وثبات وقارا

متسلسه من ضيم الايام وتدل
‎‏ولا ترمي الا من ثقيل العيارا

تشبه نوادر سبق الهجن ف البل
‎اموسّمات ارقابها من يسارا

تطرب على صوتي ليا قمت اهوبل
لازرفلت ندر بنات البكارا

ناداني الغيم الكريم المبجل
‎اللي يصافحنا بليل ونهارا

فالطايف اللي حسن وصفه مكمل
‎وقمت اتنقا ف الكبار الكبارا

ياسيدة شعر الغزل جيت بسال
‎عن هالجمال اللي مهو مستعارا

جوك ، وغيمك ، والمطر ، ليه تحتل
‎اقلوب عشاقك بدون اعتبارا

ارضك كذا من خلقة الله تهبل
‎ولا حباها الله بين الديارا

الغيم مستعمر سماكِ ولا مل
‎يلهم قلوب العاشقين الحيارى

(واجواء ليلك) فالمساء مالها حل
‎امسبّبه حب وعذاب ودمارا

فيك الورود اليانعه صعب تذبل
‎اغصانها تلعب يمين ويسارا

ارضك على قمه جبل للتأمل
‎صارت لعشاق السياحه مزارا

يا فاتنه في كل ( موسم مَحفل )
‎كل المدن بعدك تضيع وتوارا

حتى الشفق يفتن بلونه ليا حل
‎اليا دنا المغرب وزاد احمرارا

مالوم زوارك ليا صرت الاول
‎فانظارهم ) دايم واول خيارا

لاغبت عنك اسبوع جيتك (مبهذل)
‎احس كني خارج عن المسارا

نفسيتي في وقتها ما تحمّل
‎كني كسيرن ضايقته الجبارا

(نفسية الطالب) ليا قام ماحل
‎اليا طلع من قاعة الاختبارا

ماودي ابعد عنك ( ياشيخت الكل )
‎ولاني مبدل فيك … دارن بدارا

اخاف اطّول عنك .. واتوه واظل
‎توهت مسيحيًن ف دين النصارى

قالت طلبتك يافهد هات واكمل
‎قصيدتن عصماء فيني تجارا

نطرب على شعرك ونفرح ليا هل
‎مثل العطا .. لازار بيت الفقارى

اكتب شعر (فصحى) وهاته مرتَل
‎فيني . عشان احرق قلوب العذارى

انا صعيّبت ذوق . وبسرعه امل
‎وعندي ثقافه ف الشعر والمدارا

قريت ل احمد شوقي ابيات تذهل
‎حفظت مقطوعات منها قصارا

ان كان عن تاريخيني الحلو تجهل
‎بعطيك نبذه طيبه بختصارا

يكفيك من تاريخي الناس تنهل
‎مثل الجبل فوقه علم فيه نارا

كنت اجمع العالم هنا قبل ترحل
‎اليا قضوا من حجهم والجمارا

في سوقي المعروف صيتاً ومدهل
‎عكاظ والاسم المعتق مزارا

اسمه لعشاق الادب وين ماحل
‎تسمع صدى صيته بسر وجهارا

فيه البلاغه والفصاحه ومنهل
‎منهل ثقافات سيبقااا منارا

عرفت ذلحينه انا ليه الاجمل ؟
‎وليه الشعر عندي يزيد ازدهارا ؟

قلت ايه انا خابر وعارف ولا اجهل
‎تاريخك اللي كلبوه افتخارا

لو شاف ( شوقي ) زود حسنك • تهول
‎روّح هذاك الليل مثل السكارى

قام ايتفصحن بالقصيد .. وتمثل
‎يقول وصفك صعب .. ماينتجارا

وهذا ترى شين طبيعي وان دل
‎الحسن فيكِ مكتنز باذدخارا

يخاف معك يقصّر المددح (ويذل)
‎يظلم نصيبك … وانت منها مجارا

في وقتها بالله قولي وش الحل
‎اليا زعل سفحك … وغيمك توارا

ضحكت وقالت لي (وانا ليه ابدّل )
‎شعرك بشعر الغير » عيبٍ وعارا

هذيّ هي اللي ما تخيّلتها ( بل )
‎ولا لقيت الها بعقلي / مطارا

ياسيدي / انت ترى الكل فالكل
‎مالي ( ف ابو نواس ) وانته ( نزارا )