يانغيمش بن فهيد والوقت دوار
تبغالها يالخال نفسن صبوره
تشكي من الدنيا مع موت الاشجار
وتقول وين اهل النفوس الشكوره
كلن على ظهره يحمّل بالاوزار
اللي على فعل المعاصي جهوره
وقلوبهم ماكنها غير الاحجار
صارت صدور الناس حيل محشوره
اما الكرونا ماتسويه الاحرار
مصنوع سوتها كلابن عقوره
من فعلها ذالوقت مبحث للاسرار
واهان مصدرها بداية عبوره
ثم انتشر بالناس في كل الاقطار
محدن من العالم يوقف مروره
ساس البلا ايران واللي لها زار
اهل العداوه من قديم العصوره
حي الكويت العز ، ياحيها دار
تسمع نصايح ربعها بالمشوره
جونا ومعهم بالمرض كل الاضرار
حطتهم الدوله مكان امحجوره
واللي حصل كله مقدر بالاقدار
وصارت ديار اهل الخليج امحصوره
ونسمع من العالم على كل الاقمار
قالو يموت ان كان جته الحروره
واشوف بعض الناس بالحيل منهار
خايف على نفسه ، ايحاتي بزوره
الله عزيز الشان بيديه الاعمار
كافل لعبده في عشاه وفطوره
الحافظ الله والتزم كل الاذكار
هذا الذي عايش حياة السروره
واسلك طريق الحق مع نهج الاخيار
اسعد حياة الناس واطيب شعوره
واطلب اله الكون مع وقت الاسحار
يجلي المرض عنا ، علينا امعسوره
واختامها صلو على خير الابرار
باب الجنان مفتّحه في حضوره
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.