شاعر زمانه قال ذا الحين بأقدم
واقول كل اللى طرا وسط بالي
وانخاك يا صقرً كما البرق لا هم
ياجيدً بالجود ماله مثالي
عبدالله اخو الفهد لظلم يهدم
بالحق راسي من رواسي الجبالي
بأشرح لك انا العلم والقلب منسم
والقول واضح والخبر في مقالي
الناس فرحانه وانا اعيش في غم
والعمر ماله طعم والهم فالي
درت بي الايام واصبحت مهتم
واحترت بالغربه على ما جرالي
هذا زمان الهم والوقت حتم
يا كم سقاني المر و أقول حالي
واصبحت مثل اللى مهلوس ومختم
مما تشوف العين واللى طرالي
صارت لنا الدنيا كمينن ومرتم
وتصيدنا صيد الفهد للغزالي
واجروحنا بالقلب ماعاد تلتم
واحنا نعيش بغربتن وانعزالي
بين العقوم ولا احدالحين يهتم
عقمن جنوب وعقمن اخرشمالي
حرس حدود وهمنا ذا محتم
بين العقوم السجن ماله محالي
وشهور بالغربه مع الضيم والهم
ونحارب الارهاب واهل الظلالي
ما ندري امن الموت حنا بنسلم
لا جاء مهرب ناوين بالقتالي
نقبضه مع حملته لو هو تقدم
ونحاكمه ويذوق رد الفعالي
هذاعملنا صعب والناس تعلم
حتى الرواتب ماتجي بالكمالي
شوفولنا حلن سريعن بلاذم
ترا كثير الجند صابه خبالي
هذا حزين وذا تشوفه مكتم
والكل بالغربه وطال المطالي
واللى تزوج كيف شمله بيلتم
لاعاش كل العمر في بر خالي
يرفع ميت معروض بالنقل مهتم
والعمركله سفرتً وارتحالي
جندي الحرس مجرود همه مختم
ولا يعرف الراحه وبالهم يلالي
واولاده يعيشون في حال ميتم
وهو مع الغربه يعد الليالي
هذا هو اللي صار فيما تقدم
هذي حقيقه واضحه لامحالي
واختم بذكرالله والقاف ذا تم
الواحد المعبود لفض الجلالي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.