بـاديٍ راس عالي

باديٍ راس عالي - عقب ماضاق بالي
من عذابٍ جرالي - صحت لاهل الحميه
 
صحت مما دهاني - عقب سيد الغواني
يوم شد ونساني - كبر حزني عليّه
 
شد مضنون عيني - ماطرا له يجيني
حط بينه وبيني - فرجةٍ سرهديه
 
قمت ادوّر محله - وارفع الصوت كله
اثر دار المذله - من وليفي خليه
 
قلت يادار ولي - يوم تجفين خلي
ادّعي يوم اصلي - جعلك الله سنيه
 
قالت الدار فايل - من حسين الدلايل
راح ما عنك سايل - ما ذكر لك وصيه
 
وزم فكري وطاشي- من همومٍ بجاشي
ضاع قلبي بلاشي - في اطلاب اجنبيه
 
ضاع قلبي وجيته - من مضيعه نهيته
بذّني ما قويته - عابرٍ في نويه
 
قلت يا قلب ضايع - عقب زين الطبايع
قال ماني بطايع- من يخلي خويه
 
قلت خلاك خالي - فالشقا و الوبالي
راح زين الدلالي - فيك ماله دعيه
 
حن قلبي ووني- بالمثايل يغني
بيّح الصدر مني - والسدود الخفيه
 
وقلت زين اللحوني- يوم دكت اشطوني
ناس لا تنشدوني - وقع الشر فيّه
 
اول الشر جاري - والغضي منه داري
حدني للعزاري- والحياة الشقيه
 
الشقا لي اعشاقه- والبلا و المحاقه
كلها من افراقه - و المحبه بليه
 
ربي اللي بلاني - في هوى مودماني
لين حبه دعاني - دق عود النصيه
 
من محبة ودادي - يبس زرع الفوادي
مات قبل الحصادي - ماحصل له اسقيه
 
لو سقاني وليفي - من ثمانٍ صفيفي
كان عيدي وريفي - وصل جثل الزويه
 
آه واروح روحي - عند حلو المزوحي
ياجماعه اجروحي - من افراقه طريه
 
بالفراق اتهزا - لين حالي تمزا
وان بغيت اتعزا - حن طاريه ليّه
 
كل ما ذكر يمي - قمت ارحب و اهلي
ليت ابو ذاك عمي - وان هم لي دنيه
 
كان احيّر على اللي - يوم جيته امفلي
فز واقبل يهلي - لي ابزود التحيه
 
ليت حظي يحوشه - بالرضا غير هوشه
كان كل المعوشه- فوق كبدي هنيه
 
صابني راس شره - ليت ذقت المضره
وين بري و بره - دام حن هالسويه
 
لو صفالي ودودي - الغزال العنودي
غير غض النهودي - ما لقلبي انحيه
 
منوتي في حياتي - سيّد الغاوياتي
ان حصل هو غناتي -مر جميع البريه
 
كاملاتٍ اوصوفه- والحكايا طروفه
لهرج بالمروفه- فت كبدي اللظيه
 
فتّها من حلاته - بالمروّه وذاته
لو نحصّل سواته - مالقينا حليه
 
بالحسن و الملاحه - و النقا و الفصاحه
جودلٍ في امزاحه- ما يجي قلّبيه
 
سابحاتٍ اجعوده - واضحاتٍ اخدوده
جالساتٍ انهوده- غامجاتٍ اشفيه
 
وكن بيض الثنايا - بين حمر الشفايا
در بعض المطايا - او ثمر صاعقيه
 
والوصف الاخر تراني - يوم احلي الثماني
زاهر القحوياني - في رياضٍ عذيه
 
نابياتٍ اردوفه - والزلوف امحذوفه
فوقهن يوم اشوفه- وقت عيد الضحيه
 
يوم احلي جديله- مثل ذيل الاصيله
والعيون الكحيله - تقل عيون اوحشيه
 
طير ياللي تحومي - ما تبلغ اعلومي
لا قضيت اللزومي - لك اشروطٍ قويه
 
و خلي يا عذولي - حافياتٍ ارجولي
عقب زين الدلولي - ضعت فالمهمهيه
 
 
الشاعر / سعود بن عبدالعزيز الكويتي