يقول من عدّا طويل الكهوفي
مزمومة ركن الوحش في كهفها
عيطا تهيّض كل قلب عطوفي
جرد السنين مهدمات طرفها
سقت النظر فيها على طول شوفى
وابطيت أسيل ارياي في منعطفها
وسوّيت من بدع المثايل حروفي
أبيات شعر من الضمير إنعسفها
لولو ومرجان وجميع الصنوفي
وأزهار ورد تعجب اللي قطفها
ابني عليه إن ساعدني ظروفي
والكلمة اللي ما تجوز إنحذفها
شعر على وضح النقا فيه نوفي
وافي ومفهوم المعاني وصفها
متحمل راعيه يأخذ ويوفي
ويدرى خطا ميلات حرف حرفها
لو شاف من بعض المواقف صدوفي
يجحد بلاه وغايته ما كشفها
يدرى ليال في قمرهن كسوفي
وعوايد سيل التطوّر جرفها
دنيا تقلبها ما هو بمعروفي
مر تميل ومر ترفع سقفها
من ضدها عيت تليّم شفوفي
وازريت أميّز ميلها من نصفها
راحت بربع يجمعون الصفوفي
فهود الرجال اللي على الله خلفها
خطلان الأيدي مكرمين الضيوفي
اللي تعز نفوسها من شرفها
دنيا ودين وبالقرايب تروفي
وقفاتهم صعبه على من وقفها
ودنياك واله ما عليها حسوفي
لا صار تاليها يخالف سلفها
تمرّنا سود الليالي وتطوفي
مر الفياض زعوج هيف تلفها
يا ما رعينا من نبات القفوفي
بأرض بكور الوسيم سيله نسفها
وشفنا ظعون معورجات الشنوفي
تتلى سلف بدو هميم شعفها
ومجالس فيها ندا ومعروفي
وربع ملازيم المراجل هدفها
راحت بهم دنياك حدر اللجوفي
غدت بهم جرد السنين وصدفها
وأنا ما لوم العاقل اللي يسوفي
اللي على الماضي دموعه ذرفها
لا شفت دور اليوم يزداد خوفي
الفرق واضح والسلوم نعرفها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.