ياراكب اللي مثل ذيب الغداري

ياراكب اللي مثل ذيب الغداري
جر العوى في عاليات الشماخير

جمسً من امريكا ولا هو فراري
ومقبال صدامه يبشرك بالخير

مايسبقه مخلوق فالكون حاري
ولا يسبقه برقً ، ولا يسبقه طير

جمس ولو هو شفت منه العزاري
افز له وقت الضححى فزه الزير

لاجهم ظلام الليل زان المساري
ادوج به من حوطه سدير لتمير

صناعته ،، ماهوب صيني تجاري
من يد امريكي عظيم التفاكير

مصنوع من احدث طرازاً حضاري
ما بعد تطويره ،،، يفوز اي تطوير

ماهو بساعه في محل القفاري
ولاهو بضاعه في محل التنانير

مدير في دربه ولا هو إداري
عشقه ولاعشق البني الغنادير

ريح المواتر عنه ريحه مجاري
والجمس عطر باطيب المسك تعطير

من مصنعه جابوه شايخ وضاري
والارض تفرش له ورورد ونواوير

اسمه من امريكا ماهو مستعاري
اسمً تطاطي له ،، جباه الاساطير

ماساق في وقت الخطى الاعتذاري
مدلعً من خلقه الله على السير

بين الكفر والقاع ضرب الشباري
ولا جات عجلاته بوسط البناشير

ماهوب ،، لا لكزس ولاهو سفاري
جمس خلقه الله يهيض الشواعير

ولاهو بغرواً خالع الثوب عاري
الا كما ،،، قرماً يقود الطوابير

وكن الاشاره من يمين ويساري
تعطيك عن حذفته عذراً وتبرير

وكن صوت دعسانه تراتيل قاري
شيخ قرى الايات معنى وتفسير

او صوت عبروداً من اطلاق ناري
في محفلا يجمع زحول ومناعير

وكنك ليا ،،،،، دبلت له يا مشاري
يشبه تشاحيطه صياح الجماهير

يلعب على القيعان لعب المهاري
وارقام طبلونه ،، يجي فيه تشفير

وكن لون بديه في تخوم البراري
لون الخجل في خده الزين يامنير

او لون نقشاً ،، في كفوف العذاري
ومخضب بديه من الصنع ماضير

وكن تندته لا اشعف عليه الذواري
يشبه شموخ طويق والا شمنصير

ما لبسو البيبان، ،،، عازل حراري
وقزازته تردع ،،، سيوفً بواااتير

ومرايته ،، تكشف كواكب مداري
وتكشف قصايدنا وبوح الاسارير

وكنه ليا وقف ،،، وقوف انتظاري
وقوف ضميانً ،، على جمه البير

يمشي تقول انه ،،، يبى الانتحاري
اقبل على الموت بدون اي تفكير

مافيه لا شكه ،،،،،، ولا به مواري
اطلق وابرك من فلوس وقناطير

هبوط طياره هبوط اضطراري
هبوط جمسي بعد صوت تكبير

خطراً روي به في صحيح البخاري
او صار ايه في ،،، كتاب المزامير

او صار اسمه في القرار الوزاري
ليثً ولد ليثً ما هو ثعل او عير

ولو خطفني ،، طاري من طواري
حضرت له في البايكه دون تاخير

جيته وبين في الضلوع انكساري
وقبلت بديه من ،،، معزه وتقدير

مدام اقصى الناس خابر وداري
جيته وانا كني عن الارض باطير

وان كان باعه خبل ماهو بشاري
بيموت مايقدر يحسب المخاسير

لا قام يضرب في قدومي بواري
رحبت به ترحيبه الطيب والخير

يقطع تهاتيه ،،،،،، الخلا والكباري
ويشفي جروح قلوب ناسً مضاهير

اسوق به في كل شبر في دياري
يالين اوصل ،، دار دعج النواظير

غرواً خفيف الدم زاد انبهاري
لونه خذى من لون نوقاً مغاتير

ابو عيون مثل شمس الظهاري
وابو خديداً املسً ،، ناعمً غير

وابو صويتً مثل صوت القماري
وابو شفايف حمر من جمره النير

وعنقً عليه ،، يبين موعد دماري
عنق الظبي من غير كذب وتزوير

قاسي ليا سكر ،،، عليها الزراري
نواهد من فوق ،،، بطنه مزابير

نواهده يحتار ،،،،،،، فيها قراري
مرفوعهً كنه ،،، شموخ المواكير

وخصراً على الارداف عارف وقاري
تاقف على خصره جموع الخطاطير

وردف كما مرقاب ،، شامخ وذاري
والا طعوسً في ، الثمامه حمارير

ردايفً منها ،،،،، اشوف احتضاري
ضيق عليها الثوب في حزه عصير

واختم بما قلته ،،،، انا باختياري
في مدح جمس مادخل بالتقادير

خمسين بيتً ،،، جبتها بقتداري
ماجبتها من لطش شاعر وتحرير

الشاعر مسعود القحطاني