ويل قلبي من جمالك ويل قلبي من لثامك
من نظر عينك امامه يشهد الله طار نومه
انت فارض فالعذارى طيبتك بعد احترامك
واوّل انسانً اشوفه طيبته تهزم خصومه
ولعنبوا من هو تعمد يالغضي يقطع كلامك
انت يوم انك تسولف عاشقك ضيع علومه
هرجتك وصفه طبيب ووصفتي حول ابتسامك
مع ثناياك اللذيذه تخلف الصوام صومه
عن بقايا الغيد عندي كرم الوالي مقامك
انت لك قومهً تساوي فالملا تسعين قومه
عن طهر وجهك حبيبي ليش ماتجلي ظلامك
شعرك اللي فاح ريحه بالعطور وصرت اهومه
لا تسوق لمن يحبك يابعد عمري ملامك
لو يسوي ما يسوي فيك تكفى لا تلومه
ايه احبك وانت تدري كم سنين اتبع نظامك
وايه احبك وانت تدري عاشقك يعرف سلومه
اشكرك شكراً جزيلاً يوم بينت اهتمامك
ويوم جيت تقول عذرك فالهجر باحلى نعومه
اه يا محلى هروجك واه يا محلى سلامك
غيرت سلم المحبه في مساء تشبه نجومه
من كبر ذيكالمفاتن فيك ماتونس عظامك
كن خصرك فيه ضعف وكن صدرك فيه زومه
ميزك ربي تعالى في جلوسك وبقيامك
كنك سهيل اليماني وانتظر موعد قدومه
كن جسمك تحت ثوبك ناويً رد انتقامك
قام يصرخ ودي اطلع من ملابسك الظلومه
لا تلوم اللي يحبك من خوالك أو عمامك
من يشوفك قدم عينه قام يمزع في هدومه
لو عطيت الناس بضعه من غلاك ومن غرامك
كان من هو نام عنك ما تهنى في حلومه
المهم إني احبك وانت مبداك وختامك
هيبتك بين العذارى هيبه رجال الحكومه
الشاعر مسعود القحطاني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.