يالي تبى البل وقلبك طايرٍ معها
مالوم عينك وقلبك يوم تغليها
مير الحراسيس عندك لاتجمعها
مامن فوايد من الحرسوس ترجيها
وان سام الجزار باول سومته بعها
عساه يشتالها ويقلع مراسيها
وان شفت صفرٍ سناد الزين واشعها
غارب وعرقوب طيبتٍ مجانيها
دبسن من الصفر حلواتن مقاطعها
من ساس عبدان بينتٍ مواريها
بياعت البل عطها من المال وقنعها
سلم دراهمك جعلك رابحن فيها
عليك بالنايفه ترى السعد معها
صفرن مثل صفر ابن ماجد تحاليها
صفرٍ لعبدالله ابن صعيب سنعها
يم المشاليف والعرفا حراويها
يمشي مع اطرافها ماهو موّدعها
عبدالله اللي مسنعها وقاديها
من دون القفر الخلاوي مايرجعها
تمشي على كيفها وتاصل مشاهيها
ومن الدكاكه الى عوجان مرّبعها
هاذي مداهيلها ماني بناسيها
يالي تبيها ولادليت موقعها
رمحات من صيتها يبين طاريها
في جو عوجان والعرفا تطلعها
مد الدرابيل لقصاها ودانيها
عندي نصيحة صديق ابيك تسمعها
من واحدٍ منصح وعليك مهديها
منقية الصفر عندك لاتضيعها
صفرٍ تنومس وترفع راس راعيها
توجع كبود العدا بالحيل توجعها
تقول تاطى على الحاسد مواطيها
دور صبين على القعده يطبعها
ليا صاح جاته طفايح يوم يدعيها
مخلف بن صعيب الديحاني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.