ياطالع أوصل من جوابـي خيـاره. لـ عضيب بن هليل الحربي

ياطالع أوصل من جوابـي خيـاره - عضيب بن هليل الحربي

ياطالع أوصل من جوابي خياره
للي عرفنا بالمواقف سيرهم

ياللي طلوعك بالسعد والنداره
يابن الرجال اللي قديمٍ ظفرهم

هاض الضمير من أشتياق وغزاره
وأسباب ماهاضه ربوعٍ ذكرهم

اللي لشوفتهم نسوق البشاره
شفي مشاهدهم وشفي جبرهم

أشرف نهارٍ شرفوا بالزياره
وأنا بمحلٍ منتحي عن ديرهم

هذا الدليل من الوفاء والوقاره
تجاوزا بعد الديار بسفرهم

والكل قدم لي جزيل أعتذاره
زودٍ علي طول المسير وسهرهم

اللي مواقفهم مواقف جباره
فحول الرجال اللي بعيدٍ نظرهم

منهم محمد ريف ضيفه وجاره
ومرزوق ريف اللي لفوا من سدرهم

مع لافي النفجان نادر حراره
وأناأتشرف وأفتخر من فخرهم

ربعٍ عمى عين العنيد ودماره
يوم اللقاء ماأحدٍ يجي في نحرهم

عدوهم مجبور بالأنكساره
دائم يعاف عنادهم من سبرهم

أبن العسيلي منهج الطيب كاره
مسقي صناديد العداء من كدرهم

ومرزوق نمرٍ من سلائل إنماره
وينبيك عن بعض المواقف خبرهم

ولافي عرفنا ماقفه وأشتهاره
يوم أرقصوا بعض البشرفي سكرهم

ماخاب ظن المحتري وأنتظاره
قلبي حظى بحضورهم وأنتظرهم

شاهدتهم والريق فيها مراره
وتم الوداع وعودوا مع أثرهم

عسى الجميع موفقٍ في مساره
الله يمّن سيرهم من خطرهم

بلغ سلامي كل واحد بداره
أما أوصل المكتوب ولاأنت زرهم

أحمل سلامي وأوصله من نهاره
بتحيةٍ تظفي علي من حضرهم

من خاطرٍ ماشال زوم وكباره
اللي علي دافع وفاهم شكرهم

عرف النشاما ياخديني تجاره
راع المثل قدام ذكري ذكرهم

أهل المواقف والشيم والنعاره
الرابح اللي دون ماله ذخرهم

ولاّ ترى الرديان ذكروا خساره
اللي ذخرياديب منهم خسرهم

ياليت بالرديان ياخوي شاره
من شأن من شاف العلامه حقرهم

من شأن تعرف قيمته وإحتقاره
حتى مشاكيل الرجال تحذرهم

أحذر ترى الرديان زيلة خباره
عززجنابك لاتغرّك صورهم

ساس الرداء مذكور بالأنهياره
عزوم الرجال تعزهم وتعثرهم

أحدٍ على العليا تسوقه غياره
ومدهالهم رجم الشرف ماعسرهم

واللي قنع بالهينه وأنحداره
ذولاك ماأحدٍ بالجماعه شهرهم

ناسٍ تحط السيده مستشاره
ياليت معبودٍ خلقهم دمرهم

وأخير من كثرالكلام أختصاره
ولاينحصي صاح البشر من عورهم

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.